Microsoft дэлхий нийтийг хамарсан тасалдлыг өмнө хийсэн сүлжээний шинэчлэлтэй холбон тайлбарлалаа
Тасалдал кибер халдлага, хиймэл оюун ухаан, агенттай холбоогүй гэж Microsoft мэдэгджээ.
Microsoft компани дэлхий даяар үйлчилгээ нь тасалдсаныг кибер халдлагатай бус, өмнө хийсэн сүлжээний хүчин чадлын шинэчлэлээс үүдсэн техникийн хязгаарлалттай холбон тайлбарлалаа.
Outlook, Teams, Copilot зэрэг Microsoft-ын үндсэн бүтээгдэхүүнд хэрэглэгчид Баасан гарагт нэвтэрч чадахгүй болсон нь дэлхий даяар түгшүүр дагуулсан. Үүний дараа компани ийнхүү тайлбар өгчээ.
Өмнө хийсэн хүчин чадлын шинэчлэлтэй холбоотой асуудал саяхан сүлжээнд өөрчлөлт оруулсны дараа ил гарсан гэж Microsoft Баасан гарагт X сүлжээнд нийтэлсэн мэдэгдэлдээ дурджээ. “Энэ нь кибер халдлага, хиймэл оюун ухаан, агенттай холбоогүй техникийн асуудал байсан. Өмнө хийсэн сүлжээний хүчин чадлын шинэчлэлийн явцад гарсан алдаа саяхны сүлжээний өөрчлөлтийн дараа илэрсэн” гэж компани тайлбарлав.
Асуудлын үндсэн шалтгааныг арилгасан бөгөөд тасалдалд өртсөн үлдсэн харилцагч, бүс нутгуудад үйлчилгээг сэргээх ажлаа эрчимжүүлж байна гэж Microsoft мэдэгдэв. Эрэлт их байсан тул үйлчилгээг аажмаар, үе шат бүрт тогтвортой байдлыг нь шалгаж сэргээх аргыг сонгосон гэж компани тайлбарлажээ.
“Сэргээх ажилд сэтгэл өег ахиц гарч, өртсөн дэд бүтцийн улам олон хэсэгт үйлчилгээний хүртээмж, цахим шуудан хүргэх гүйцэтгэл сайжирч байна” гэж компани мэдэгдээд, нөхцөл байдал хэвийн түвшиндээ ойртож байгааг онцолжээ.
“Энэ явдлын улмаас харилцагчид, түншүүддээ учруулсан хүндрэлийн төлөө бид гүнээ уучлалт гуйж байна. Харилцагчид, түншүүд маань бидний үйлчилгээнд итгэл хүлээлгэдгийг бид мэдэж байгаа бөгөөд энэ хариуцлагад туйлын нухацтай ханддаг” гэж Microsoft мэдэгдсэн байна.
Компанийн багууд болсон явдлыг судалж байгаа бөгөөд шалгалт дууссаны дараа тасалдлын талаарх бүрэн тайлан нийтлэх юм.
