Москвад халдлага хийх төлөвлөгөө байгаа тухай АНУ-ын анхааруулгад Орос хариу өгчээ
АНУ, Оросын тагнуулын мэдээлэл солилцоо Трамп, Путин хоёрын улам дотносож буй харилцааг харуулж байна.
Москва дахь АНУ-ын Элчин сайдын яам нийслэлд энэ амралтын өдрүүдэд «террорист» халдлага төлөвлөж байгаа тухай анхааруулсны дараа Оросын Холбооны аюулгүй байдлын алба (ФСБ) «зохих» арга хэмжээ авсан гэж мэдэгджээ. Энэ тухай Австралийн «Эй Би Си» телевиз мэдээлэв.
Элчин сайдын яам бямба гарагт Москвагийн өмнөд хэсэгт байрлах Царицыно музей-нөөц газарт олон хүн амь үрэгдэж болзошгүй халдлага болох бодит аюул байгааг мэдэж байна гэж мэдэгдсэн байна. АНУ-ын засгийн газар Оросын холбогдох байгууллагуудтай арга хэмжээгээ зохицуулсан бөгөөд иргэдийг тэр орчмоос зайлсхийж, олон хүн цугларсан газраас холдохыг зөвлөжээ.
Элчин сайдын яам халдлагыг хэн төлөвлөж байгаа талаар дэлгэрэнгүй мэдээлэл өгөөгүй. Царицыно бол ялангуяа амралтын өдрүүдэд олон хүн зочилдог эзэн хааны ордон, цэцэрлэгт хүрээлэнгийн цогцолбор юм.
Хууль сахиулах байгууллагатай холбоотой гэгддэг Оросын «База» Телеграм суваг цэцэрлэгт хүрээлэнг хааж, зөвхөн гарах замыг нээлттэй үлдээсэн гэж мэдээлжээ. ФСБ АНУ-аас террорист халдлага бэлтгэж байгаа тухай мэдээлэл хүлээн авсан гэдгээ өмнө нь мэдэгдсэн байна.
АНУ-ын Элчин сайдын яам 2024 оны гуравдугаар сард Москвад хэт даврагчид удахгүй халдлага хийх төлөвлөгөөтэй байгааг анхааруулж байсан. Хэдхэн хоногийн дараа зэвсэгт этгээдүүд Москвагийн ойролцоох «Крокус Сити Холл» концертын танхим руу дайрч, 140 гаруй хүний аминд хүрсэн юм.
Энэ удаагийн мэдээлэл солилцоо АНУ-ын Ерөнхийлөгч Дональд Трамп, Оросын Ерөнхийлөгч Владимир Путин хоёрын улам дотносож буй харилцааг тодотгож байна. Трамп өнгөрсөн сард Оросын дизель түлш худалдан авах маргаантай гэрээ байгуулж, Москваг эдийн засгийн хувьд тусгаарлах барууны олон жилийн хүчин чармайлтыг эргүүлсэн юм.
Европын хэвлэл мэдээллийнхний мэдээлснээр Путин Трампын урилгыг хүлээн авч, арванхоёрдугаар сард АНУ-д болох G20-ийн дээд хэмжээний уулзалтад оролцох юм.
Путин 2019 оноос хойш G20-ийн дээд хэмжээний уулзалтад оролцоогүй бөгөөд Орос 2014 онд Крымийг өөртөө нэгтгэсний дараа G8-аас хасагдсан байна.
