Москвагийн сэдэвт галт тэрэг Шэньжэний метронд явж эхэлжээ

Москвагийн сэдэвт галт тэрэг Хятадын Шэньжэнь хотын метронд явж эхэлснийг Москва хотын дэд дарга Наталья Сергунина Лхагва гарагт сэтгүүлчдэд мэдэгджээ. Энэ тухай Интерфакс агентлаг мэдээлэв.

Түүний хэлснээр, нээлтийн ёслол Ази, Номхон далайн эдийн засгийн хамтын ажиллагааны дээд хэмжээний уулзалтын өмнө болж буй бусад арга хэмжээний хүрээнд болсон аж.

“Энэ галт тэрэг Москвагийн арга хэмжээний хөтөлбөрийг хүлээн авч буй Шэньжэнь, түүх соёлын өвтэйгөө танилцахыг урьж буй Москва гэсэн хоёр хотын зочломтгой байдлын бэлгэ тэмдэг юм. Зорчигчид манай үзэсгэлэнт газрууд, аялал жуулчлалын дэд бүтэцтэй танилцах боломжтой” гэж Сергунина онцолжээ.

Нээлтийн ёслол Гансяа Хойд буудалд болжээ. Шилэн бөмбөгөр бүхий футурист дизайнтай атриумаараа энэ буудал “Шэньжэний нүд” хэмээн алдаршсан юм. Галт тэрэг 12 дугаар сарын 8 хүртэл нисэх онгоцны буудал, хотын баруун дүүргүүдийг төвтэй холбосон метроны шугамаар явна.

Вагонуудын гадна талд Москвагийн архитектурын дурсгалт газруудыг дүрсэлжээ. Дотор нь толин зурагт хуудас байрлуулсан тул зорчигчид ВДНХ үзэсгэлэнгийн цогцолбор, Москвагийн амьтны хүрээлэн, алдарт өндөр барилгууд зэрэг газрын дэргэд байгаа мэт зураг авахуулах боломжтой гэж Сергунина тайлбарлажээ.

Москва хотын Аялал жуулчлалын хорооны мэдээлснээр, Шэньжэний Соёлын ордонд Лхагва гарагт Москвагийн түүх, соёлын тухай номын булан нээгдэж, Оросын балетын ид шид нэртэй гала тоглолт болно. 12 дугаар сарын эхээр тус хотод Москвагийн павильонууд нээгдэж, хотуудын хамтарсан хөгжил, хамтын ажиллагааны ирээдүйтэй чиглэлийг хэлэлцэх бизнес уулзалтууд хийхээр төлөвлөжээ.

Хонконг, Шэньжэнь дэх цуврал арга хэмжээг ОХУ-аас Хятадад суугаа Элчин сайдын яамны дэмжлэгтэйгээр Москвагийн засгийн газар зохион байгуулж байгаа юм. Хорооны мэдээллээр, хуучин ЗХУ-ын орнуудаас бусад гадаад улсуудаас Оросын нийслэлд ирэх жуулчны аяллын тоогоор Хятад тэргүүлдэг.