Найробид нурсан барилгын нурангиас анхны цогцсыг гаргаж, 16 хүн сураггүй хэвээр байна
Барилга шаардлагатай зөвшөөрөлгүй баригдаж байсан гэж Найробигийн захирагч мэдэгджээ.
Кенийн нийслэл Найробид долоо хоногийн өмнө нурсан 18 давхар барилгын нурангиас баасан гарагт анхны цогцсыг гаргаж, 16 хүн сураггүй хэвээр байна. Энэ тухай Африканьюс мэдээлэв.
Найробигийн хөл хөдөлгөөн ихтэй Истли худалдааны дүүрэгт баригдаж байсан барилгын бетон, төмрийн дороос нэгэн эмэгтэйн цогцос олдсон байна. Эрх баригчид нурангийг хайхад дулааны дүрслэлийн камер ашиглаж байна.
Найробигийн захирагч Жонсон Сакажагийн хэлснээр, барилга шаардлагатай зөвшөөрөлгүй байсан бөгөөд барилгыг шалгаж, ашиглалтын гэрчилгээ олгохоос өмнө доод давхар, хонгилын худалдааны талбайг түрээслэх нь хууль бус юм.
Сураггүй хүмүүсийн ар гэрийнхэн долоо хоногийн турш газар дээр нь хүлээж байгаа ч нуралтаас хойшхи 72 цагийн шийдвэрлэх хугацаа өнгөрсний дараа зарим нь итгэл найдвараа алдаж байна.
Бямба гарагаас хойш амьд хүн гаргаагүй байна. Өмнө нь дөрвөн хүнийг нурангиас аварсан юм.
Энэ долоо хоногт эрх баригчид Хятадын багийн нийлүүлсэн дулааны дүрслэлийн төхөөрөмж авчирсан бөгөөд албаныхны хэлснээр, уг технологиор нурангийн дор хоёр хүн байгааг илрүүлжээ.
