НАСА-гийн Свифт сансрын дуран 22 жил тойрог замд ажилласны эцэст агаар мандалд шатжээ

НАСА-гийн Свифт сансрын дуран тойрог замаасаа гарч, Индонезийн дээгүүр дэлхийн агаар мандалд шатсаныг Медуза сайт НАСА-г иш татан мэдээлжээ.

Нэг хагас тонн жинтэй, 500 сая долларын өртөгтэй төхөөрөмжийг 2004 онд орчлон ертөнцийн хамгийн хүчтэй энергийн цацрал болох гамма тэсрэлтийг судлах зорилгоор хөөргөсөн юм. Анх хоёр жилийн хугацаатай төлөвлөсөн ч 22 жил тойрог замд ажилласан байна.

Энэ хугацаанд дуран 1400 гаруй хэт шинэ одны дэлбэрэлтийг судалж, тэнгэрийг бүхэлд нь рентген туяагаар ажиглаж, астероид, сүүлт од, хар нүхийг судалжээ. Түүний цуглуулсан мэдээллийг 7000 орчим эрдэм шинжилгээний бүтээлд ашигласан аж.

Нарны идэвхжил өндөр байсны улмаас агаар мандлын нөлөө тэлж, дуран хурдаа алдан доошилж эхэлсэн байна.

НАСА дуранг аврахын тулд найман сарын дотор тусгай төхөөрөмж бүтээж, түүнийг дурантай ойртуулан барьж, илүү өндөр тойрог зам руу аажмаар өргөхийг зорьжээ. Ийм ажиллагаа амжилттай болбол ирээдүйд Хаббл зэрэг бусад хиймэл дагуулыг аврах боломжийг харуулах байсан юм.

Гэвч хөөргөсний дараа уг төхөөрөмж хяналтгүй эргэлдэж, зорилгодоо хүрээгүй тул НАСА 10 дугаар сарын 20-нд дурангийн ажиллагааг зогсоожээ.