Нигер хоёр энгийн иргэнийг хөнөөсөн дроны халдлагад Чадыг буруутгав

Нигерийн цэргийн засгийн газар даваа гарагт Чадыг хоёр энгийн иргэнийг хөнөөж, бусдыг шархдуулсан дроны халдлага үйлдсэн гэж буруутгажээ. Хоёр орны харилцаа муудсаар байгаа энэ үед ийнхүү буруутгасныг Африканьюс сайт мэдээлэв. Эрх баригчдын үндэсний телевизээр уншсан мэдэгдэлд дурдсанаар, энэ явдлын дараа Нигер Чадын элчин сайдыг дуудан уулзжээ.

Ниамей дайсагнасан үйлдлээ нэн даруй зогсоож, учирсан хохирлыг нөхөн төлөхийг шаардсан байна. Засгийн газрын мэдээлснээр, халдлага бямба гарагийн өглөө эрт Нигерийн хойд хэсгийн Эми Лулу уулархаг нутаг дахь Сальвадорын давааг онилжээ. Алжир, Ливитэй хиллэдэг алслагдсан уурхайн бүс нутагт орших энэ даваа хууль бус наймаа, зэвсэгт бүлэглэлүүдийн гол зам болдог.

Нигер энэ цохилтыг түрэмгийллийн үйлдэл, бүрэн эрхт байдлаа зөрчсөн явдал гэж нэрлэж, Чадыг хөлсний цэргүүдийг дэмжиж, энгийн иргэд болон стратегийн дэд бүтцийг онилж байна гэж буруутгав. Хуучин колоничлогч Францтай харилцаагаа тасалсан Ниамей халдлагыг Парисын дэмжлэгтэйгээр үйлдсэн гэж мөн мэдэгджээ.

Нигер энэ асуудлыг НҮБ-ын Аюулгүйн зөвлөл, Африкийн холбооны Энх тайван, аюулгүй байдлын зөвлөлд хүргэхээ мэдэгдэж, бие даасан олон улсын мөрдөн шалгалт явуулахыг шаардаж, түншүүдээ эв нэгдэлтэй байхыг уриалжээ. Ниамей 9 дүгээр сард таслан зогсоосон бослогод Чадыг оролцсон гэж буруутгаж, Франц цэргийн засгийн газрыг тогтворгүй болгох оролдлогыг дэмжиж байна гэж мэдэгдэж байсан юм.