Нигери 3.5 тэрбум ам.долларын Бакасси далайн гүн боомтын бүтээн байгуулалтыг эхлүүллээ
Бакассийн боомт Лагосоор дамждаг гадаад худалдааны ачааллыг бууруулна гэж Ерөнхийлөгч Тинубу мэдэгджээ.
Нигерийн Ерөнхийлөгч Бола Тинубу Баасан гарагт Кросс-Ривер мужид 3.5 тэрбум ам.долларын өртөгтэй Бакасси далайн гүн боомтын бүтээн байгуулалтыг эхлүүлжээ. Олон жил хойшилсон уг төсөл Нигерийн далайн тээврийн хүчин чадлыг нэмэгдүүлнэ гэж Холбооны засгийн газар мэдэгдэв.
Ёслолд Тинубуг төлөөлж Дэд ерөнхийлөгч Кашим Шеттима оролцов. Дэд ерөнхийлөгчийн албан дахь Ерөнхийлөгчийн ахлах тусгай туслах Стэнли Нквочагийн мэдэгдэлд дурдсанаар, төсөлд 20 метрийн гүнтэй далайн гүн боомт, ачааг тус улсын бусад бүс нутаг руу тээвэрлэх 260 километр урт хурдны зам багтах төлөвтэй.
Тинубугийн хэлснээр, одоогоор Нигерийн гадаад худалдааны 80 гаруй хувь Лагосоор дамждаг нь түгжрэл үүсгэж, ачаа саатуулж, үнийг өсгөж болзошгүй. “Энэ төсөл Лагосын эсрэг биш. Нигерийн төлөө. Лагос чөлөөлөгдвөл Нигери амьсгална. Калабар ажиллавал Нигери хоёр хөл дээрээ алхана” гэж тэрбээр хэлжээ.
Боомтыг колончлолын үед анх санаачилж, 2014 онд дахин төлөвлөсөн бөгөөд байгаль орчин, нийгэмд нөлөөлөх байдлын үнэлгээг 2015 оны гуравдугаар сард дуусгасан гэж тэрбээр нэмж хэлсэн. Үүний дараа төсөл зогсонги байдалд орсон бөгөөд Кросс-Ривер мужийн захирагч Бассей Оту түүнийг хэрэгжүүлэх хүчин чармайлтыг сэргээжээ. Тус муж Африкийн экспорт-импортын банкнаас 3.5 тэрбум ам.долларын санхүүжилт авч, 2025 оны хоёрдугаар сард төр, хувийн хэвшлийн түншлэлийн гэрээ байгуулсан байна.
Хөрш орнуудаар дамжиж буй ачааг Нигери өөр рүүгээ татаж чадвал тус улсын цэнхэр эдийн засаг жилд 44 тэрбум ам.долларын орлого олж болно гэж Тинубу хэлжээ.
Төсөл улс төр, байгаль орчин, хууль эрх зүйн саад бэрхшээлтэй тулгарч байсныг захирагч Оту дурдсан байна. “Бид байгаль орчинд нөлөөлөх байдлын үнэлгээ хийж, гидрограф, геотехник, геофизикийн судалгааны тайлан гаргасан. Мөн төсөлд 2.27 тэрбум ам.долларын анхны санхүүжилттэйгээр Холбооны гүйцэтгэх зөвлөлийн зөвшөөрөл авсан” гэж тэрбээр хэлэв.
Уг боомт Нигери болон Чад, Нигер, Мали, Буркина-Фасо зэрэг далайд гарцгүй орнуудын хоорондын худалдааны холбоог бэхжүүлж болно гэж Нигерийн боомтын захиргааны гүйцэтгэх захирал Абубакар Данцохо хэлжээ.
