Нигерид үдэшлэгийн дараа их сургуулийн дөрвөн оюутан нас барсан хэргийг цагдаа шалгаж байна
Оюутнууд согтууруулах ундаа, мансууруулах бодисыг зүй бусаар хэрэглэсний улмаас амиа алдсан бололтой гэж их сургуулийн удирдлага урьдчилсан мэдээллээ үндэслэн үзэж байна.
Нсукка хотын Хилл Топ дүүргийн нэгэн байранд болсон үдэшлэгийн дараа Нигерийн их сургуулийн (UNN) дөрвөн оюутан нас барсан хэргийг шалгаж эхэлснээ Нигерийн Энугу мужийн цагдаа мэдэгджээ.
Дөрвөн оюутан Лхагва гарагт амиа алджээ.
Их сургуулийн удирдлага хэргийг баталж, урьдчилсан шалгалтаар оюутнууд согтууруулах ундаа, мансууруулах бодисыг зүй бусаар хэрэглэсний улмаас нас барсан бололтой гэж мэдэгдсэн байна.
Их сургуулийн ректор Саймон Ортуаня оюутнуудыг алдсантай холбогдуулан их сургуульд гурван өдрийн гашуудал зарлав.
Хоёр эрэгтэй, хоёр эмэгтэй хохирогч үдэшлэгт согтууруулах ундаа уусан гэх бөгөөд үүний дараа бие нь муудсан тухай Энугу мужийн цагдаагийн хэвлэлийн төлөөлөгч Даниэль Ндукве Пүрэв гарагт гаргасан мэдэгдэлдээ дурджээ.
“Өөр зургаан оюутныг эмчлүүлэхээр эмнэлэгт яаралтай хүргэсэн бол дөрвөн хохирогч эмнэлэгт хүргэгдэх үедээ нас барсан байсан нь тогтоогдсон. Хэргийн газраас согтууруулах ундаа хураан авч, талийгаачдын шарилыг задлан шинжилгээнд зориулж моргт хүргэсэн” гэж Ндукве хэлэв.
Мужийн цагдаагийн газар нас барсны шалтгааныг тогтоохын тулд “хэргийн нөхцөл байдлыг” шалгаж эхэлснийг тэрбээр мэдэгдээд, “мөрдөн байцаалт ахихын хэрээр нэмэлт мэдээлэл өгнө” хэмээн амласан байна.
