Нигерийн Коги мужид олон улсын нисэх онгоцны буудал барих ажил эхэллээ

Нигерийн Нисэх, сансрын салбарыг хөгжүүлэх сайд Фестус Кеямо Мягмар гарагт Зариаги тосгонд Коги олон улсын нисэх онгоцны буудлын барилгын ажлыг эхлүүлэв. Уг төсөл мужид хөрөнгө оруулалт татаж, эдийн засгийн боломжийг тэлж мэднэ гэж тэрбээр хэлжээ.

Premium Times сонины мэдээлснээр, Кеямо Коги мужийн захирагч Ахмед Ододогийн хамт барилгын шав тавьжээ. Тэрбээр төслийг холбооны засгийн газрын эдийн засгийн шинэчлэл болон мужийн засгийн газрын дэд бүтцийн тэргүүлэх чиглэлтэй холбон тайлбарлажээ. Бензиний татаасыг цуцалж, гадаад валютын зах зээлийг шинэчилсний үр дүнд мужуудад хуваарилах орлого нэмэгдэж, дэд бүтцийн төсөл хэрэгжүүлэх санхүүгийн чадавх нь өссөн гэж тэрбээр үзэж байна.

“Өнөөдрөөс эхлэн Зариаги хэмээх энэ тосгон дэлхийн нисэхийн газрын зураг дээр гарч ирнэ” гэж Кеямо хэлжээ.

Олон улсын худалдаа хараахан хөгжөөгүй мужид нисэх буудал барих нь эдийн засгийн хувьд үндэслэлтэй гэдгийг ч сайд нотлон ярив. “Нисэх буудал бол урьдал нөхцөл. Нисэх буудал бол хөгжлийн үзүүлэлт” гэж тэрбээр хэлсэн байна.

Нисэх буудал бол зах зээлд гарах боломжийг сайжруулж, хөрөнгө оруулагчдыг татах замаар мужийн хөдөө аж ахуй, ашигт малтмалын нөөцийг ашиглахад чиглэсэн стратегийн хөрөнгө оруулалт гэж захирагч Ододо хэлжээ.

Коги муж төмрийн хүдэр, шохойн чулуу, нүүрс, гантиг зэрэг ашигт малтмал болон кассава, будаа, эрдэнэ шиш, кешью, палмын тос зэрэг хөдөө аж ахуйн бүтээгдэхүүнээр баялаг. Мужийн засгийн газар нисэх буудлыг аялал жуулчлалд хувь нэмэр оруулж, ирээдүйд ачаа тээврийн үйл ажиллагаа явуулах зэргээр логистикийн үйлчилгээг хөгжүүлэхэд дэмжлэг болно гэж найдаж байна.