Норвегийн өсвөрийн хоккейн шигшээг Оросод байр гаргахын тулд дэлхийн аваргаас хасчээ

Норвегийн өсвөрийн хоккейн шигшээ баг Канадад болох дэлхийн аварга шалгаруулах тэмцээнээс хасагдаж, оронд нь Оросыг оролцуулах болсныг Евроньюс телевиз мэдээлжээ. Энэ нь Спортын арбитрын шүүх Оросын багуудыг олон улсын тэмцээнд эргүүлэн оролцуулахыг тушаасны үр дагавар юм.

10 дугаар байрт эрэмбэлэгдсэн Норвегийг 12 дугаар сарын 26-наас 1 дүгээр сарын 5 хүртэл Альбертад болох тэмцээнээс доод лиг рүү шилжүүлжээ. Олон улсын хоккейн холбоо энэ өөрчлөлтийг албан ёсоор баталгаажуулаагүй байна.

Оросын оролцоо ч тодорхойгүй байна. Тус баг Канад руу нэвтрэх визээ баталгаатай авч чадаагүй тул Норвеги байраа эргүүлэн авч магадгүй аж.

«Нөхцөл байдал тодорхойгүй хэвээр байгаа нь бидэнд итгэл найдвар төрүүлж байна» гэж Норвегийн хоккейн холбооны Ерөнхий нарийн бичгийн дарга Петтер Салстен хэлжээ.

Норвеги зэрэг зургаан орон Украины дайн үргэлжилж байгаа цагт Оросын эсрэг тоглохгүй байхаа амласан. Хоккейн хэд хэдэн ивээн тэтгэгч ч Орос оролцвол дэмжлэгээ татна гэжээ.

Шүүхийн шийдвэр 2027 оны таван дэлхийн аваргад хамаарах ба Германд 5 дугаар сард болох насанд хүрэгчдийн эрэгтэйчүүдийн тэмцээн ч үүнд багтана. Германы засгийн газар Оросыг оролцуулан тэмцээнээ зохион байгуулах бараг боломжгүй гэж мэдэгджээ.

Орос 2022 онд Украин руу бүрэн хэмжээний түрэмгийлэл эхлүүлснээс хойш олон улсын хоккейн тэмцээнээс хасагдсан. Тус баг 2021 оны дэлхийн аваргад дөрөвдүгээр байр эзэлж байжээ.