Новак: Орос АНУ-тай газрын тос, байгалийн хийн төслүүдэд эргэн орох асуудлыг одоогоор хэлэлцээгүй байна

Орос нь Америкийн компаниудыг Оросын газрын тос, байгалийн хийн төслүүдэд эргэн оролцуулах асуудлаар тэдэнтэй одоогоор хэлэлцээ хийгээгүй байгааг ОХУ-ын Шадар сайд Александр Новак Орос-Африкийн форумын үеэр мэдэгджээ. Энэ тухай Ведомости сонин мэдээлэв.

«Бидний байр суурь гадаадын түнш, гадаадын хөрөнгө оруулалтад үргэлж нээлттэй байсаар ирсэн. Тэд эргэж ирэх эсэх нь юуны өмнө тэднээс өөрсдөөс нь шалтгаална» гэж Новак хэлэв. Эксон зэрэг компаниуд эргэн ирж болох эсэх асуултад тэрбээр сөрөг хариулт өгчээ.

10 дугаар сарын 27-нд Файнэншл Таймс сонин эх сурвалжуудаас иш татан АНУ, ОХУ хоёр Украины мөргөлдөөнийг зохицуулах хэлэлцээний хүрээнд Америкийн компаниудыг Оросын газрын тосны зах зээлд эргүүлэн оруулах асуудлыг хэлэлцэж байгааг бичсэн юм.

Сонины мэдээлснээр, Цагаан ордон, Кремль мөргөлдөөн дууссаны дараа Сахалины тавиурт Америк, Оросын газрын тосны компаниудын хамтарсан төслийг сэргээх боломжийг авч үзэж байгаа бөгөөд Дружба хоолойгоор Европ руу Оросын газрын тос нийлүүлэх ажлыг сэргээхэд Америкийн компаниуд оролцох асуудлыг ч хэлэлцэж байна. Вашингтон эдийн засгийн боломжит хэлэлцээрүүдийг Москваг энхийн хэлэлцээнд оролцуулах хөшүүрэг гэж үзэж байгаа аж.