Росатом Бангладешийн Руппур атомын цахилгаан станцын хоёрдугаар блокт анхны цөмийн түлшээ нийлүүлэв

Росатом корпораци Бангладешид барьж буй Руппур атомын цахилгаан станцын хоёрдугаар эрчим хүчний блокт анхны цөмийн түлшээ нийлүүлжээ. Энэ тухай Ведомости сонин мэдээлэв.

Корпорацийн түлшний салбарын мэдээлснээр, түлшийг реакторыг анх ачаалахад зориулсан бөгөөд станцын барилгын ерөнхий зураг төсөлч, ерөнхий гүйцэтгэгч нь Росатомын инженерийн салбар юм.

Анхны блокийн реактор хамгийн бага хяналттай чадлын түвшинд хүрсэн нь урвал тогтвортой явагдаж эхэлснийг харуулж байгаа юм. Энэ шат нь реакторыг янз бүрийн чадлаар турших, эрчим хүчээр ажиллуулж эхлэх, блокийг үндэсний эрчим хүчний системд холбохоос өмнө хийгддэг.

Росатомын тэргүүн Алексей Лихачев үүнийг төслийн чухал үе шат гэж нэрлэсэн бөгөөд түүний хэлснээр, анхны блокийг Бангладешийн эрчим хүчний системд 11 дүгээр сарын эцэс гэхэд холбохоор төлөвлөжээ. 4 дүгээр сарын 28-нд Лихачев Руппур станцын барилгыг 2027 онд дуусгана гэж мэдэгдэж байсан юм.