«Новая газета Европа»: Оросын эрүүл мэнд, боловсрол дайны жилүүдэд төсвөөс дор хаяж нэг их наяд рубль дутуу авчээ

Орос улс Украины эсрэг томоохон дайн эхлүүлснээс хойш Оросын эрүүл мэнд, боловсролын салбар төсвөөс дор хаяж нэг их наяд рублийг дутуу авсныг «Новая газета Европа» хэвлэл тооцоолжээ.

Тус хэвлэлийн тооцоогоор, дайны жилүүдэд эрүүл мэндийн зардлыг инфляцаар индексжүүлсэн бол зарцуулах байсан хэмжээнээс 728 тэрбум рублиэр бага зарцуулсан байна. Боловсролын салбарт энэ зөрүү 322 тэрбум рубль болжээ.

Тус хэвлэлийн судлаачид 2021 оноос хойш нийгмийн салбарт ажилтан цомхотгосон, байгууллага хаасан 800 гаруй тохиолдол илрүүлжээ. Үүний дөрөвний нэгээс илүү нь 2026 онд гарсан байна.

Энэ оны эхний арван сард илэрсэн ийм тохиолдол 2025 оныхоос аль хэдийн давжээ. Гэхдээ тус хэвлэл нарийн тоо өгөөгүй байна.

Нийгмийн салбарын зардлыг танах шаардлагатай болсон бүс нутгуудын дунд Карели, Владимир муж зэрэг “чинээлэг бус” бүсээс гадна Кемерово, Свердловск муж, Красноярскийн хязгаар, Якут зэрэг аж үйлдвэр, уул уурхайн бүс ч багтаж байна.

Нийгмийн зардлыг 2025 оноос эрс танаж эхэлсэн бөгөөд судлаачид үүнийг 2023-2024 оны цэргийн эдийн засгийн өсөлт дууссантай холбон тайлбарлаж байна.