НҮБ Йемений хуситуудын хоригт ажилтан нь нас барсныг шалгахыг шаарджээ

НҮБ-ын Хүний эрхийн дээд комиссарын газрын Йемен дэх ажилтан Мохаммад эль-Шами хуситуудын хоригт байхдаа нас барсныг шалгахыг НҮБ шаардсан гэж «Аль Жазира» телевиз мэдээлжээ.

НҮБ бямба гарагт гаргасан мэдэгдэлдээ эль-Шами сар гаруйн өмнө нас барсан ч гэр бүлд нь саяхан мэдэгдсэн гэжээ. Хуситууд түүний үхлийн шалтгааныг хэлээгүй байна.

НҮБ-ын Хүний эрхийн дээд комиссар Фолькер Тюрк хуситуудын эрх баригчдаас бүрэн ил тод байхыг шаардаж, эль-Шамигийн үхлийг яаралтай, хараат бусаар, нарийвчлан шалгахыг уриалжээ.

Эль-Шамиг 2024 оны зургаадугаар сараас хойш дур мэдэн хорьж байсан бөгөөд тэр үед түүнийг НҮБ болон төрийн бус байгууллагуудад ажилладаг 60 гаруй хүний хамт «Америк-Израилийн тагнуулын сүлжээ»-нд хамаатай хэмээн буруутгаж баривчилжээ.

Тюрк түүнтэй хамт баривчлагдсан бөгөөд одоо ч хоригдож байгаа Хүний эрхийн дээд комиссарын газрын бусад долоон ажилтны төлөө ихэд санаа зовж байгаагаа илэрхийлж, тэднийг нэн даруй, болзолгүйгээр суллахыг дахин уриалсан байна.

НҮБ-ын Ерөнхий нарийн бичгийн дарга Антониу Гутерреш ч мөн эль-Шамигийн үхэлд цочирдсоноо илэрхийлж, мөрдөн шалгахыг дэмжжээ.

Эль-Шами бол 2025 оны хоёрдугаар сард Дэлхийн хүнсний хөтөлбөрийн ажилтан нас барсны дараа хуситуудын хоригт амиа алдсан НҮБ-ын хоёр дахь ажилтан юм. НҮБ ажилтнуудынхаа аюулгүй байдлын үүднээс 2025 оны хоёрдугаар сард хуситуудын хяналтад буй Йемений зарим хэсэгт үйл ажиллагаагаа зогсоосон байна.