НҮБ-ын биологийн олон янз байдлын бага хурал удаан үргэлжилсэн хэлэлцээний эцэст хоёр гол баримт бичиг батлав

Армений нийслэл Ереванд болсон НҮБ-ын биологийн олон янз байдлын бага хурлаар бараг 200 улс байгалийн доройтлыг 2030 он гэхэд зогсоох хоёр хэлэлцээрийг баасан гарагт баталжээ. Энэ тухай Франс Твенти Фор мэдээлэв.

Хоёр долоо хоногийн хурцадмал хэлэлцээ эцсийн өдөр нэмэлт цагт үргэлжилсний эцэст баримт бичгүүдийг баталсан бөгөөд эцсийн хувилбарыг нь олон нийтэд даруй ил болгоогүй байна.

“Тэгээд л боллоо. Төгс” гэж бага хурлын ерөнхийлөгч Амбарцум Матевосян алх цохин хэлэхэд төлөөлөгчид алга ташжээ.

Дэлхий 2022 онд биологийн олон янз байдлын доройтлыг 2030 он гэхэд зогсоох түүхэн гэрээ байгуулсан ч дэлхийн хуурай газар, далайн 30 хувийг хамгаалах зэрэг зорилтуудын ихэнх нь хангагдахгүй байгааг НҮБ анхааруулж байв.

Хэлэлцээний үеэр орнууд чулуужсан түлш, эрчимжсэн хөдөө аж ахуй, загасны хэт агнуур зэрэг байгальд хортой үйл ажиллагааг дэмждэг татаасыг шинэчлэх асуудлаар маргажээ. Экосистемийг сэргээх, ховордсон зүйлийг аврахад одоогийнхоос жилд 700 тэрбум ам.доллар нэмж шаардлагатай гэж тооцдог.

Европын холбоо Хятад зэрэг баян хөгжиж буй эдийн засагтай орнуудыг байгаль хамгааллын санхүүжилтэд оролцуулахыг шаардсан бөгөөд баасан гарагт тарсан нэгэн төсөлд хандивлагч бус орнуудыг сайн дураараа нэгдэхийг урьжээ.

Генетикийн мэдээлэл ашигладаг корпорациудын ашгаас хуваалцах Калигийн санг сайжруулах оролдлого ч хэцүү байв. 2025 оны эхээр байгуулагдахдаа жилд 1 тэрбум ам.доллар цуглуулахаар зорьсон тус сан одоогоор 10,000 орчим ам.доллар л татжээ.

Энэ долоо хоногт 70 орчим сайд хэлэлцээнд нэгдсэн юм. 2024 онд Колумбид болсон өмнөх бага хурал тохиролцоогүй өндөрлөж, 2025 онд Ромд дахин хэлэлцэж байж хэлэлцээрт хүрч байсан бөгөөд дараагийн бага хурлыг 2028 онд Панам эсвэл Эквадор зохион байгуулна.