Nvidia-ийн хоёр томоохон хувьцаа эзэмшигч Женсен Хуан эргэн ирэх боломжийг авч үзэхийг ТУЗ-д уриалав

Nvidia-ийн хоёр томоохон хувьцаа эзэмшигч компанийн ирээдүйн удирдлагын талаарх бүх хувилбарыг, тэр дундаа “Женсен Хуан эргэн ирэх боломжийг” авч үзэхийг Төлөөлөн удирдах зөвлөлд уриалж байна.

Altimeter Capital компанийн гүйцэтгэх захирал Брэд Герстнер баасан гарагт X сүлжээнд захидал нийтэлж, Nvidia-ийн ТУЗ-ийг “Nvidia-ийн ирээдүйн удирдлагын асуудлаар удаан, тэнцвэртэй, нухацтай үйл явц явуулахыг” уриалжээ. Захидалд мөн Atreides Management компанийн Гэвин Бейкер гарын үсэг зурсан байна.

АНУ-ын Үнэт цаас, биржийн хороонд (SEC) хамгийн сүүлд ирүүлсэн тайлангаар Nvidia нь Altimeter Capital-ийн ил болгосон хамгийн том хувьцааны хөрөнгө оруулалт байжээ. Тус компани зургадугаар сарын 30-ны байдлаар Nvidia-ийн бараг 1.9 тэрбум ам.долларын үнэ бүхий 9.4 сая ширхэг хувьцаа эзэмшиж байв. Atreides зургадугаар сарын эцэст бараг 250 сая ам.долларын үнэ бүхий 1.2 сая ширхэг хувьцаа эзэмшиж байсан.

Захидалд Nvidia-г түр гүйцэтгэх захирал Колетт Кресс “чадварлаг удирдана” гэжээ. Кресс 13 жил Nvidia-ийн санхүү хариуцсан захирлаар ажилласан бөгөөд ТУЗ пүрэв гарагт Хуан байхгүй үед компанийг тэрбээр удирдана гэж зарласан юм.

“Гэвч энэ гайхамшигт компанийг үүсгэн байгуулагч, олон жил гайхалтай удирдсан удирдагч нь бүх баримт тодорхой болохоос өмнө түүнийг солих гэж шаардлагагүй яарахаас зайлсхийсэн нухацтай үйл явцаар шийдүүлэх эрхийг өөрөө олж авсан” гэж захидлын төгсгөлд бичжээ. Захидалд Хуаныг нэн даруй албан тушаалд нь эгүүлэн тогтоохыг шаардаагүй байна.

Nvidia-ийг үүсгэн байгуулагч Женсен Хуан амрагийн харилцаатай байсан гэх хэд хэдэн буруутгал гарсан энэ үед пүрэв гарагт огцорсон. Үүний нэг нь Хятадын тагнуулч гэж сэжиглэгдэж буй Алис Хуантай холбоотой. Алис Хуан Nvidia-ийн үйлчлүүлэгч Megaspeed компанитай бас хамтран ажиллаж байжээ. Сингапурт төвтэй Megaspeed компанийг Nvidia-ийн хязгаарлалттай хиймэл оюун ухааны чипийн нийлүүлэлтийн зарим хэсгийг Хятад руу шилжүүлсэн байж болзошгүй хэргээр АНУ-ын Хууль зүйн яам шалгаж байна.

SpaceX-ийн гүйцэтгэх захирал Илон Маск Хуаныг эгүүлэн томилохыг хүссэн өргөдөлд гарын үсэг зурснаа баасан гарагт X сүлжээнд бичжээ. Онлайнаар тарж буй Женсенийг дэмжье нэртэй өргөдөл 100000 гаруй гарын үсэг цуглуулсан гэж мэдэгджээ. Тэдний дунд Nvidia-ийн одоогийн 5000 гаруй ажилтан бий гэнэ.

Хуангүйгээр зарим “чухал хэлцэл алдагдана” гэж Маск бямба гарагт X сүлжээнд бичжээ.

Баасан гарагт илгээсэн өөр нэг захидалд АНУ-ын Худалдааны сайд Ховард Лутникийг Megaspeed-ийн талаар Төлөөлөгчдийн танхимын Тагнуулын хороонд мэдүүлэг өгөхийг уриалсан байна.

Захидалд дурдсанаар Лутник Худалдааны яам “Хятад дэвшилтэт хиймэл оюун ухааны чип олж авахаас сэргийлэх өргөн үүргээ зохих ёсоор гүйцэтгэж байгаа эсэх” талаар арванхоёрдугаар сарын 10-нд Сенатын Банкны хороонд мэдүүлэг өгөхөөр зөвшөөрсөн байна. Хуанаас мөн мэдүүлэг өгөхийг хүссэн аж.

New York Times сонины мэдээлснээр Худалдааны яам Megaspeed-ийн талаар анх мөрдөн шалгалт эхлүүлсэн бөгөөд Nvidia-ийн хуульч Худалдааны яамны өндөр албан тушаалтантай холбогдсоны дараа 2025 онд уг шалгалтыг Хууль зүйн яаманд шилжүүлжээ.

АНУ-ын Ерөнхийлөгч Дональд Трамп пүрэв гарагт Хятадад айлчлах хуваарьтай боловч Хятадын дарга Ши Жиньпинтэй уулзахдаа Nvidia болон тагнуулч гэж сэжиглэгдэж буй этгээдтэй холбоотой асуудлыг хөндөхөөр төлөвлөөгүй гэж АНУ-ын албан тушаалтнууд мэдэгджээ. Маск арваннэгдүгээр сарын 18, 19-нд Хятадын Шэньжэнь хотод болох Ази, Номхон далайн эдийн засгийн хамтын ажиллагааны дээд хэмжээний уулзалтад Трампыг дагалдан явах төлөвтэй байна.