Ойрхи Дорнодод их бороо орсон ч усны хомсдол хэвээр байна гэж НҮБ анхааруулав
Хүчтэй Эль-Ниньо 2027 онд цаг агаарын эрс тэс үзэгдлийг улам хүчтэй болгож болзошгүй гэж Дэлхийн цаг уурын байгууллага үзэж байна.
Ойрхи Дорнодын зарим бүсэд ер бусын их бороо орсон ч усны хомсдол хэвээр байгааг Дэлхийн цаг уурын байгууллага даваа гарагт мэдэгдсэн гэж Нэшнл сонин мэдээлжээ.
Тайланг Туркт эхэлсэн КОП31 уур амьсгалын бага хурлын нээлтийн өдөр нийтэлсэн бөгөөд 2025 оны гандуу жилийн дараа Ойрхи Дорнодод хур тунадас ер бусын их орсныг тэмдэглэжээ.
Гэвч их бороо бүс нутгийн усны урт хугацааны асуудлыг шийдээгүй. Газар доорх болон гол, нуур, усан сангийн цэнгэг усны нөөц хэвийн түвшнээс доогуур хэвээр байна.
2014 оноос хойш хуурай газрын усны нөөц дэлхий даяар буурч байгаа бөгөөд өнгөрсөн онд үнэлсэн газар нутгийн 42 хувьд цэнгэг усны нөөц хэвийнээс доогуур байсан нь урт хугацааны дундаж болох 25 хувиас хамаагүй өндөр юм.
«Эль-Ниньо гаригт шинэ дулаан нэмдэггүй, харин хэмжилтийн түүхэн дэх хамгийн бүлээн далайн дулааныг ялгаруулдаг» гэж байгууллагын Ерөнхий нарийн бичгийн дарга Селесте Сауло хэлжээ.
Сауло сүүлийн дөрвөн жил 177 жилийн ажиглалтын түүхэн дэх хамгийн дулаан жилүүд болсныг, далайн дулаан арав дахь жилдээ дээд амжилт тогтоож байгааг дурдав. Оны эхний есөн сард дэлхийн агаарын хэм аж үйлдвэржилтийн өмнөх үеэс 1.47 хэмээр өндөр байжээ.
Далайн түвшин 6, 7, 8 дугаар сард 1993 онд хиймэл дагуулын хэмжилт эхэлснээс хойших хамгийн өндөрт хүрсэн. Далайн түвшин 1993-2002 онд жилд дунджаар 2.4 миллиметрээр, 2017-2026 онд 3.9 миллиметрээр нэмэгджээ.
Дэлхийн хүн амын 11 орчим хувь буюу 900 сая орчим хүн далайн түвшний өсөлт, үерт өртөх эрсдэлтэй намхан эргийн бүсэд амьдардаг. Байгууллагын мэдээлснээр Эль-Ниньо дор хаяж 2027 оны 2 дугаар сар хүртэл үргэлжилнэ.
