Филиппиний гахайн аж ахуйчид импортын хоригоос гадна гаалийн татвар нэмэхийг шаардаж байна
Импортын гахайн мах 2023-2025 онд огцом өсч, дотоодын фермийн үнэ уналтад орсон байна.
Филиппин гахайн махны импортыг 60 хоногоор хориглосон ч энэ нь хэтэрхий бага бөгөөд хожимдсон арга хэмжээ гэж гахайн аж ахуйчид үзэж, гаалийн татварыг нэмэгдүүлэхийг шаардаж буйг Рапплер сайт мэдээлжээ.
Аж ахуйчид квотоос гадуурх импортын татварыг одоогийн 25 хувиас 40 хувь, квотын доторхыг 15 хувиас 30 хувь болгож өмнөх түвшинд нь сэргээхийг хүсч байна.
«Татварыг өөрчлөхгүй бол түр зогсоолт ямар ч үр дүнгүй» гэж Алянса Агрикультура бүлгийн дарга Эрнесто Ордоньес 11 дүгээр сарын 9-нд хэлсэн байна.
Хөдөө аж ахуйн сайд Франсиско Тиу Лаурел 11 дүгээр сарын 8-нд гарын үсэг зурсан 33 дугаар тушаалаар гахайн махны импортыг 60 хоногоор хориглосноо мэдэгдсэн. Сайд татварыг өмнөх түвшинд нь сэргээх нь эцсийн шийдэл гэдэгтэй санал нийлжээ.
Хөдөө аж ахуйн яамны тооцоогоор 2023-2025 онд гахайн махны импорт 41.8 хувиар өссөн нь фермийн үнийг уналтад оруулж, дотоодын салбарт ноцтой хохирол учруулсан байна.
Тиу Лаурел фермийн үнэ сайжрахгүй бол хоригийг сунгаж болохыг, шаардлагатай бол дахин 140 хоног нэмэх боломжтойг дурдав.
Яамны мэдээлснээр Филиппинд 170 хоног буюу бараг зургаан сарын гахайн махны нөөц бий. Зах зээлд илүүдэл нийлүүлэлт байгаа тул зул сарын баярын үеэр үнэ өсөхгүй гэж сайд таамаглажээ.
