ОХУ-ын ГХЯ: Орос улс Европын хоригт хариу болгож гаалийн татвараа нэмэгдүүлж байна

Орос улс хориг арга хэмжээний хариуд гаалийн татвараа нэмэгдүүлж, импортыг хязгаарлаж байна гэж ОХУ-ын Гадаад хэргийн яамны Эдийн засгийн хамтын ажиллагааны газрын дарга Дмитрий Биричевский ТАСС агентлагт өгсөн ярилцлагадаа мэдэгджээ.

“Эдгээр арга хэмжээ нь хязгаарлалтын нөхцөлд дотоодын үйлдвэрлэгч, экспортлогчдыг дэмжих боломж олгохоос гадна үндсэндээ манай иргэн, хуулийн этгээдийн эсрэг дайсагнасан үйлдэлд өгч буй хариу юм” гэж тэрбээр хэлэв.

Биричевскийн хэлснээр, Орос улс барууны хязгаарлалтад хариу арга хэмжээ авах яам, агентлаг хоорондын механизмыг аль эрт бүрдүүлжээ. Энэ механизмаар тодорхой бүтээгдэхүүний импортын гаалийн татварын хувь хэмжээг нэмэх, тодорхой бүлэг барааны импортыг хязгаарлах, экспорт, импортод квот тогтоох зэрэг арга хэмжээ авдаг. Шийдвэрийг холбогдох төрийн байгууллага, бизнесийн төлөөллийн оролцоотой иж бүрэн шинжилгээний дараа гаргадаг бөгөөд зорилго нь дотоодын зах зээлд сөрөг үр дагавар учруулахгүй байх гэж тэрбээр онцолжээ. Мөн ОХУ-ын засгийн газар хориг тавигдсанаас хойш эдийн засгийн тогтвортой байдлыг хангах цогц арга хэмжээ боловсруулж хэрэгжүүлсэн гэж тэрбээр тэмдэглэв.

Европын холбоо арваннэгдүгээр сарын 16-нд Оросын эсрэг нэмэлт хориг батлахаар төлөвлөж байна. Шинэ хязгаарлалт дахин 150 байгууллага, 50 банкинд хамаарна. Байгууллагуудын дийлэнхийг жагсаалтад оруулахыг Франц санал болгосон байна.

Оросын эсрэг тавьсан барууны хориг ойрын зургаан жилд цуцлагдах магадлал бага гэж ОХУ-ын Гадаад хэргийн яамны Тусгай даалгаврын элчин сайд Александр Трофимов арваннэгдүгээр сарын 13-нд мэдэгджээ. Оросын эсрэг хязгаарлалт огт үр нөлөөгүй гэж хэлж болохгүй ч Оросоор барууны орнуудын ашиг сонирхлын дагуу үйлдэл хийлгэх гэсэн оролдлого бүтэлгүйтсэн гэж тэрбээр хэлсэн. Гадаад эдийн засгийн харилцааг төрөлжүүлж, дайсагнасан орнуудын хяналтаас гадуур тогтолцоо бий болгосноор хоригийг даван туулах боломжтой гэж тэрбээр үзжээ.