Өмнөд Африкийн олимпийн аварга усанд сэлэгч Татьяна Смит Нидерландыг төлөөлөн өрсөлдөхөөр болжээ

Өмнөд Африкийн усан сэлэлтийн од Татьяна Смит спортын харьяаллаа Нидерланд болгон өөрчилж байгаагаа Мягмар гарагт зарлажээ.

Africanews сайтын мэдээлснээр, энэ шийдвэрийн дагуу Өмнөд Африкийн олимпийн хамгийн олон медальт тамирчин 2028 оны Лос-Анжелесийн олимпод Нидерландын төлөө оролцоно. Тэрбээр хоёр улсын иргэншилтэй.

Смит олон нийтийн сүлжээнд нулимс дуслуулан бичсэн бичлэгтээ Өмнөд Африкийг төлөөлсөндөө бахархаж байгаагаа илэрхийлж, шийдвэрийг нь бүх хүн ойлгож, хүлээн зөвшөөрөхгүй байж болохыг мэдэж байна гэжээ.

Гэвч санхүүгийн болон бодит бэрхшээлээс болж усан сэлэлтийн карьераа тогтвортой үргэлжлүүлэх хэцүү байж болох бөгөөд тамирчид зүгээр л амь зогоох бус, өсөж дэвжих боломжтой байх ёстой гэж тэрбээр нэмжээ. Нидерланд илүү их дэмжлэг үзүүлж, карьераа тогтвортой үргэлжлүүлэх боломж олгоно гэж олимпийн хоёр удаагийн аварга Смит хэлсэн байна.

Смит сүүлийн үед тамирчдын сайн сайхан байдал, эрх ашгийн асуудлыг идэвхтэй хөндөж, шагналын мөнгө саатуулсан, арилжааны боломж хязгаарлагдмал байгаа зэргээр нь Өмнөд Африкийн усан сэлэлтийн холбоог шүүмжилж байсан. Тэрбээр Өмнөд Африкт амьдарч, өдий хүртэл хамт явсан багтайгаа бэлтгэлээ үргэлжлүүлнэ.

Смит 2021 онд болсон Токиогийн олимпод Татьяна Шунмейкер нэрээр өрсөлдөж 200 метрийн мэлхий сэлэлтэд, 2024 оны Парисын олимпод 100 метрийн мэлхий сэлэлтэд түрүүлсэн. Мөн Токиод 100 метрт, Парист 200 метрт мөнгөн медаль хүртэж, Өмнөд Африкийн хамгийн амжилттай олимпийн тамирчин болсон юм. Тэрбээр Парисын олимпийн дараа зодог тайлсан ч ердөө хоёр сарын өмнө эргэн ирэхээ зарласан байна.