Өмнөд Солонгос мэдээлэл задарсан 168 хүний паспортыг шинэчилнэ

Өмнөд Солонгосын Гадаад хэргийн яам мэдээлэл нь интернэтэд задарсан 168 хүн, тэр дундаа Ерөнхийлөгч Ли Жэ Мён, тэргүүн хатагтай Ким Хэ Гёнгийн паспортыг дахин олгох ажлыг эхлүүлсэн гэж Кориа Таймс сонин мэдээлжээ.

«Гадаад хэргийн яам нөлөөлөлд өртсөн бүх хүний паспортыг саадгүй шинэчлэх арга хэмжээг шуурхай авч байна» гэж хэвлэлийн төлөөлөгч Пак Ду Сун хэлжээ.

Яам мөн зургадугаар сарын айлчлалтай холбоотой компьютер, цахим шуудангийн хаягуудыг техникийн шалгалтад оруулж байгаа юм.

Мэдээллийг вэбсайтаас устгах арга хэмжээ авч, бусад хувийн мэдээлэл задарсан эсэхийг шалгаж байна гэж яам мэдэгджээ.

Цагдаа урьдчилсан шалгалт явуулж байгаа ч задралын нөхцөл байдал, хариуцагчийг одоогоор тогтоогоогүй байна.