Өмнөд Солонгосын цагдаа ерөнхийлөгчийн мэдээлэл задарсан хэргийг шалгаж эхэлжээ

Өмнөд Солонгосын цагдаа Ерөнхийлөгч Ли Жэ Мён зэрэг 168 хүний хувийн мэдээлэл интернэтэд задарсан хэрэгт урьдчилсан шалгалт эхлүүлсэн гэж Кориа Таймс сонин мэдээлжээ.

Үндэсний цагдаагийн газар шалгалтыг даваа гаригт эхлүүлсэн байна. Эрх баригчид гадны этгээд оролцсон байж болзошгүй гэж үзэж байгаа аж.

Хохирогчдын дунд Ли, тэргүүн хатагтай, Засгийн газрын гишүүд, тамгын газар, Гадаад хэргийн яамны өндөр албан тушаалтнууд, хамгаалалтын алба, сэтгүүлчид багтжээ.

Задарсан мэдээлэлд нэр, албан тушаал, төрсөн огноо, паспортын дугаар, хүчинтэй хугацаа багтсан байна. Файл зургадугаар сарын 2-ноос хойш хэдэн сарын турш хандах боломжтой байсан гэж мэдээлж байгаа юм.