Өмнөд Солонгосын харилцаа холбооны зохицуулагч апп доторх төлбөрийн бодлогын төлөө Гүүгл, Эпплийг торгов

Өмнөд Солонгосын өргөн нэвтрүүлэг, харилцаа холбооны зохицуулах байгууллага апп доторх бодлогоор дамжуулан апп хөгжүүлэгчдийн төлбөрийн сонголтыг хязгаарласан хэргээр Гүүгл, Эппл компаниудад нийт 63.7 тэрбум вон буюу 45 сая ам.долларын торгууль ногдуулахаа лхагва гарагт мэдэгджээ. Энэ тухай Ёнхап агентлаг мэдээлэв.

Солонгосын Хэвлэл мэдээлэл, харилцаа холбооны хороо апп дэлгүүрийн төлбөрийн бодлогоороо Харилцаа холбооны бизнесийн тухай хуулийг зөрчсөн гэж үзэж, Гүүглийг 42.9 тэрбум воноор, Эпплийг 20.81 тэрбум воноор торгохыг баталсан байна.

Хорооны үзэж буйгаар, хоёр компани апп хөгжүүлэгчдийг тодорхой төлбөрийн арга ашиглахыг албадаж, гуравдагч талын төлбөрийн хувилбарт таагүй нөхцөл тавьснаар давамгай байр сууриа урвуулан ашигласан юм. Хороо мөн засах тушаал гаргах боловч АНУ-ын хоёр компанийн эсрэг эрүүгийн гомдол гаргахгүй.

Зохицуулагч 2023 оны 10 дугаар сард Гүүгл, Эппл компаниудад зөрчлийн талаар анх мэдэгдсэнээс хойш гурав орчим жилийн дараа энэ шийдвэр гарчээ. Хороо хоёр компанийг апп доторх гадаад төлбөрийн холбоос зэрэг өөр төлбөрийн аргыг санал болгохыг хөгжүүлэгчдэд зөвшөөрч, гуравдагч талын төлбөрийн системийн хураамжийг зохистой түвшинд хүргэхийг тушаасан.

Хоёр компани засах тушаал хүлээн авснаас хойш нэг сарын дотор хэрэгжүүлэх төлөвлөгөөгөө ирүүлж, гурван сарын дотор шаардлагатай өөрчлөлтийг хийх ёстой юм.

Гүүгл харамсаж буйгаа илэрхийлж, хороо хөгжүүлэгчдэд илүү олон төлбөрийн сонголт олгож, шимтгэлийг бууруулах зорилготой саяхны бодлогын өөрчлөлтийг нь харгалзаагүй гэжээ. Эппл ч хорооны шийдвэрийг хүлээн зөвшөөрөхгүй байгаагаа мэдэгдэж, өнгөрсөн жил апп дэлгүүрийнхээ экосистемээс олсон орлогын 90 гаруй хувь хөгжүүлэгчдэд буцсаныг онцолсон бөгөөд Солонгосын хуулийн дагуу дараагийн алхмаа судалж байгаа аж.