Өмнөд Солонгос тэнгисийн явган цэргийн дотоодын довтолгооны нисдэг тэргийг бүтээж дуусгав

Өмнөд Солонгос олон талт газар-усны ажиллагаанд зориулан агаараас газар луу харвах пуужин зэрэг олон төрлийн зэвсгийн системээр тоноглосон тэнгисийн явган цэргийн дотоодын довтолгооны нисдэг тэргийг бүтээж дуусгасныг тус улсын Батлан хамгаалахын худалдан авах ажиллагааны газар лхагва гарагт мэдэгджээ. Энэ тухай Ёнхап агентлаг мэдээлэв.

Газрын мэдээлснээр, довтолгооны нисдэг тэрэг нь Сурион нисдэг тэрэгний тэнгисийн явган цэргийн хувилбар болох Мариноны суурь дээр бүтээгдсэн бөгөөд дайсны нисдэг тэрэг, дроны халдлагыг сөрөх шинэ онцлог, зэвсгийн системтэй болжээ.

Газар 2022 онд дотоодын довтолгооны нисдэг тэрэг бүтээх 450 тэрбум воны төсөл хэрэгжүүлж эхэлсэн. Түүнээс хойш цамхагт суурилуулсан пулемёт, агаараас газар луу харвах пуужин, удирдлагатай болон удирдлагагүй пуужингаар бодит буудлага хийх зэрэг олон туршилтын нислэг, зэвсгийн туршилтыг хийж дуусгасан байна. Нисдэг тэрэг 7 дугаар сард байлдааны тохиромжийн бүрэн үнэлгээнд тэнцэж, 8 дугаар сард аюулгүй нислэгийн тохиромжийг баталгаажуулсан нислэгт тэнцэх гэрчилгээ авчээ.

Байлдааны бэлэн байдалд оруулсны дараа уг систем тэнгисийн явган цэргийн газар-усны ажиллагааг зөвхөн газар дээр бус агаарт ч өргөжүүлж, цэргийн хөдөлгөөнт чадварыг дээд зэргээр нэмэгдүүлэх гол хэрэгсэл болно гэж үзэж байна. Газрын мэдээлснээр, ирэх жилээс 20 орчим нисдэг тэрэг үйлдвэрлэж эхлэхээр төлөвлөжээ.