Өмнөд Солонгосын шүүгчдийн 80 орчим хувь хиймэл оюуны зохиосон хуурамч шүүхийн жишээтэй тулгарчээ

Өмнөд Солонгосын шүүгчдийн аравны найм нь хиймэл оюуны зохиосон хуурамч буюу байхгүй шүүхийн жишээг хэрэгт иш татсантай тулгарч байсныг Дээд шүүхийн судалгаа харуулсан гэж Кориа Таймс мэдээлжээ.

Дээд шүүх аравдугаар сарын 6-16-нд 360 шүүгчээс судалгаа авчээ. Хиймэл оюун худал мэдээллийг үнэн мэт гаргадаг асуудал улам түгшүүртэй болж байгаа тул уг судалгааг хийсэн байна.

Иргэний, гэр бүлийн, захиргааны хэрэг хариуцсан шүүгчдийн 196 буюу 80.7 хувь нь байхгүй жишээ, 159 буюу 65.4 хувь нь хуурамч жишээ иш татсан хэрэгтэй тулгарчээ. 41 шүүгч буюу 16.9 хувь нь хуурамч хууль, журам, 10 шүүгч буюу 4.1 хувь нь хуурамч бүтээл иш татсан хэрэгтэй таарсан байна.

Хуурамч жишээг талуудын өмгөөлөгчид иш татсан гэж 136 буюу 57.6 хувь нь хэлжээ.

Хуурамч жишээ иш татах нь шүүхийн ажиллагааг саатуулж болзошгүй тул судалгааны үр дүнд тулгуурлан үр дүнтэй арга хэмжээ боловсруулах шаардлагатай байгааг Шүүхийн ерөнхий захиргааны албан тушаалтан онцолжээ.

Судалгаанд оролцогчдын бараг 92 хувь нь тогтолцооны арга хэмжээ шаардлагатай гэж үзжээ. Торгууль ногдуулах хуулийн үндэслэл, шалгах шаардлага, удаа дараа хуурамч мэдээлэл иш татсан өмгөөлөгчдөд сахилгын арга хэмжээ авах зэрэг санал гарчээ.