Ормузын хоолой хаагдсан ч Абу Даби Портс группийн ашиг 73 хувиар өсчээ

Абу Даби Портс групп гуравдугаар улирлын цэвэр ашиг 73 хувиар өсч, 209 сая ам.долларт хүрснийг Абу Дабигийн үнэт цаасны биржид ирүүлсэн мэдэгдэлдээ Лхагва гарагт зарлажээ. Энэ тухай Зэ Нэшнл сонин мэдээлэв.

Өсөлтөд тус компани Ормузын хоолой хаагдсаны нөлөөг бууруулахын тулд АНЭУ даяар өөр тээврийн маршрутаа бэхжүүлсэн нь голлон нөлөөлжээ. 3 дугаар сараас хойш ачааны үйл ажиллагаа, тэжээгч тээврийг Фужейра, Хор Факкан боомт руу шилжүүлж, хуурай болон агаарын шинэ гүүр, нэмэлт агуулах байгуулсан байна.

Орлого өмнөх оны мөн үеэс 48 хувиар өсч, дөрвөн үндсэн салбар бүгд хоёр оронтой тоогоор өссөн байна.

“Абу Даби Портс групп 20 жилийн түүхийнхээ хамгийн хүнд үеийн нэгэнд гуравдугаар улиралд дээд амжилт тогтоолоо” гэж өнгөрсөн долоо хоногт албан тушаалдаа орсон гүйцэтгэх захирал Афиф Аль Яфей хэлжээ.

Далайн тээвэр, усан онгоцны салбарын орлого 56 хувиар өсч, нийт орлогын 58 орчим хувийг, логистикийн орлого 76 хувиар өсч 24 хувийг эзэлжээ. Боомтын салбарын орлого 12 хувиар өсч нийтийн 10 хувийг, эдийн засгийн хот, чөлөөт бүсийн салбарынх 15 хувиар өсч 8 хувийг эзэлсэн байна.

АНЭУ дахь улирлын контейнерийн эргэлт хоёрдугаар улирлаас 30 хувиар өссөн ч жилийн дүнгээр 57 хувиар доогуур хэвээр байна.

Эрчим хүчний тээвэр, дэлхийн худалдааны гол зам болох Ормузын хоолой 2 дугаар сарын 28-нд АНУ, Ираны хооронд дайн эхэлснээс хойш бараг хаагдсан хэвээр байна. АНУ, Иран хэлэлцээрт хүрээгүй тул боомт, тээвэр, логистикийн компаниуд өөр экспортын зам хайхад хүрчээ.

АНЭУ-д 40 терминал ажиллуулдаг, дэлхийн 50 зах зээлд үйл ажиллагаа явуулдаг тус групп биржээс гарч хувийн компани болох шатандаа явж байна. Абу Дабигийн Л'имад хөрөнгө оруулалтын сан 9 дүгээр сард компанийн 100 хүртэл хувийг худалдан авах саналаа үргэлжлүүлэх шаардлагыг хангасан юм.