Азийн хөгжлийн банк Узбекистаны мал аж ахуйд 60 сая ам.доллар олгоно

Азийн хөгжлийн банк Узбекистаны мал аж ахуйн бүтээмж, тэсвэрт чанарыг нэмэгдүүлэхэд 60 сая ам.долларын хөнгөлөлттэй зээл олгохыг баталснаа мэдэгджээ. Энэ тухай Газета.уз сайт мэдээлэв.

Төсөл Бухар, Кашкадарья, Навои, Самарканд мужууд болон Каракалпакстаны 29 мянга орчим жижиг фермерийн аж ахуйг хамарч, тэжээлийн хүртээмж, мал эмнэлгийн үйлчилгээ, бэлчээрийн менежментийг сайжруулах юм.

“Мал аж ахуй бол Узбекистаны хөдөөгийн олон сая оршин суугчдын орлого, хүнсний хамгийн чухал эх үүсвэр боловч энэ салбар ган, хэт халалт, усны хомсдолд улам бүр хохирч байна” гэж банкны Узбекистан дахь суурин төлөөлөгчийн газрын тэргүүн Канокпан Лао-Арая хэлжээ.

Төслийн хүрээнд ган, давсжилтад тэсвэртэй тэжээлийн ургамлын тариалалтыг өргөжүүлж, малын усны цэгүүдийг сэргээнэ. Мөн хиймэл оюунд суурилсан бэлчээрийн хяналт, фермерүүдэд зөвлөгөө өгөх, эрт сэрэмжлүүлэх гар утасны апп боловсруулж, мал аж ахуйд ажилладаг эмэгтэйчүүдэд тусгай сургалт явуулах юм.

Банкны санхүүжилтийг Ногоон уур амьсгалын сангийн 5 сая ам.долларын буцалтгүй тусламж, Японы засгийн газраас санхүүждэг сангийн 3 сая ам.долларын тусламжаар нэмэгдүүлнэ.