Египетийн Тээврийн сайд галт тэрэгний аюулгүй ажиллагаанд алдаа байгааг хүлээн зөвшөөрчээ

Египетийн Тээврийн сайд, дэслэгч генерал Камел Эль Вазир Ням гарагт Эль Аййат хотод болсон галт тэрэгний мөргөлдөөний улмаас 7 хүн амь үрэгдсэний дараа төмөр замд алдаа дутагдал байгааг хүлээн зөвшөөрсөн ч сүлжээнд олон жил оруулсан хөрөнгө оруулалтаа өмгөөлжээ. Энэ тухай Зэ Нэшнл сонин мэдээлэв.

“Бид алдаа байгааг хүлээн зөвшөөрч байна, бидний зорилго ослоос урьдчилан сэргийлэх эсвэл бууруулах юм” гэж сайд парламентын тээврийн хорооны 6 орчим цаг үргэлжилсэн хуралдааны үеэр хэлжээ. Эрүүл мэндийн яамны мэдээлснээр, осолд 125 хүн гэмтсэн байна.

Прокурорын мэдээлснээр, техникийн шалгалтаар нэг галт тэрэгний машинист автомат удирдлагын системийг унтраасны дараа зам дээр зогсож байсан Каир-Асуан чиглэлийн галт тэрэгний ар тал руу мөргөсөн нь тогтоогджээ. Энэ систем машинист улаан дохиогоор гарах эсвэл хурд хэтрүүлэхэд галт тэргийг удаашруулж, зогсоох зориулалттай юм. Машинист амь үрэгдэгсдийн дунд байжээ.

Прокурорууд дохионы бүртгэлийг хуурамчаар засварласан нь тогтоогдсон Эль Ракка өртөөний диспетчер бөгөөд өртөөний даргыг саатуулсан байна.

Энэ систем үхэлд хүргэсэн ослын гол асуудал болсон нь анх удаа биш юм. 2021 онд Сохаг хотод дор хаяж 19 хүний аминд хүрсэн мөргөлдөөний дараа сайд хоёр галт тэрэгний машинист системийг унтраасныг хүлээн зөвшөөрч, зорчигчид саатлын талаар гомдоллосноос болж сүлжээний зарим хэсэгт системийг хэсэгчлэн түр зогсоохыг зөвшөөрсөн гэдгээ хэлж байжээ.

Харин Мягмар гарагт тэрбээр 2021 оны шийдвэрээ тухайн үеийн аадар борооны улмаас галт тэргийг цагт 15 км-ээс хэтрүүлэхгүй явуулж байсан нэг удаагийн алхам гэж тайлбарлажээ. Түүний хэлснээр, системийг унтраах нь ажлаас халах шийтгэлтэй зөрчил болсон бөгөөд Ням гарагт яагаад унтраасныг тэрбээр мэдэхгүй аж.

Сайд төмөр замын зээлийг өмгөөлж, 5.1 тэрбум ам.долларын гадаад зээлээс 3.05 тэрбумыг ашиглаж, 870 сая ам.долларыг төмөр замын орлогоос төлсөн гэжээ. Зарим хууль тогтоогч түүнийг огцрохыг шаардсан бол зарим нь өмгөөлсөн байна.

Хороо аюулгүй ажиллагааны 25 гаруй зөвлөмж гаргаж, 2002 онд Египетийн хамгийн их хохиролтой төмөр замын осол гарсан Эль Аййатад ослууд яагаад давтагдаж байгааг өргөн хүрээнд шалгахыг уриалжээ. Одоогоор зөвхөн өртөөний ажилтнууд цагдан хоригдож байна.