Орос-Африкийн гурав дахь дээд хэмжээний уулзалт амжилттай болсон гэж Путин мэдэгдэв

Орос-Африкийн гурав дахь дээд хэмжээний уулзалт амжилттай өндөрлөж, Москва болон Африк тивийн улсуудын хамтын ажиллагааг цаашид бэхжүүлнэ гэж Оросын Ерөнхийлөгч Владимир Путин уулзалтын дүнгээр хийсэн хэвлэлийн бага хурал дээр мэдэгджээ. Энэ тухай Ведомости сонин мэдээлэв.

“Ерөнхийдөө бид бүгд Орос-Африкийн гурав дахь дээд хэмжээний уулзалт амжилттай болж, Орос, Африкийн харилцаа хамтын ажиллагааны хөгжилд хүчтэй түлхэц өгнө гэдэгт санал нэг байна” гэж Путин хэлжээ.

Путины хэлснээр, уулзалтаар хүрсэн тохиролцоог байнгын ажиллагаатай хамтын ажиллагааны механизмаар дамжуулан системтэйгээр хэрэгжүүлнэ.

Тэдгээрийн нэг нь салбарын яамд, бизнес эрхлэгчид, олон нийтийн байгууллага, шинжээчдийн оролцоотой түншлэлийн форум юм. Энэ ажлыг Гадаад хэргийн сайд нарын тогтмол уулзалтын хүрээнд зохицуулдаг.

Уулзалтад оролцогчид ийм уулзалтыг үргэлжлүүлэн зохион байгуулахыг санал нэгтэй дэмжсэн гэж Путин мэдэгдсэн байна. Дараагийн уулзалтын газар, хугацааг нэмж тохиролцох юм.

Эдийн засгийн хамтын ажиллагааны талаар ярихдаа Путин Африкийн улсуудтай хийх худалдааг цаашид нэмэгдүүлэх боломж байгааг онцлов.

Түүний үзэж буйгаар, одоогийн 27 тэрбум ам.долларын худалдааны эргэлт Орос болон тивийн орнуудын эдийн засгийн харилцааг хөгжүүлэх бүх боломжийг илэрхийлэхгүй байгаа юм.