Оросын Новая газета сонин хаагдах болсноо зарлав

1993 онд үүсгэн байгуулагдсан, энэ оны есдүгээр сард Оросын Хууль зүйн яамнаас гадаадын агентын жагсаалтад оруулсан Новая газета сонин хаагдахаа зарлажээ. Энэ тухай Би Би Си-гийн орос хэлний алба мэдээлэв.

“Новая газетаг алсан. Арваннэгдүгээр сарын 9-нд бид 30 жил амьдарсан гэртээ гэрлээ унтраана. Серверүүдээ унтрааж, явна” гэж сонины ерөнхий редактор Сергей Соколов мэдэгджээ.

Үүний өмнөхөн редакцийг Москвагийн төвд, Потаповский гудамжинд бараг 30 жил байрласан байрнаас нь гаргаж байгаа нь тодорхой болжээ. Соколов аравдугаар сарын 28-нд уншигчиддаа бичсэн захидалдаа шинэ байр олдоогүй, нүүхэд маш бага хугацаа өгсөн гэжээ.

Редакцийн хамт 2021 оны аравдугаар сарын 7-нд сэтгүүлч Анна Политковскаяг хөнөөснөөс хойш 15 жилийн ойгоор түүний ажлын өрөөнд нээсэн музей ч хаагдана.

Соколовын хэлснээр, гадаадын агентаар бүртгэгдсэнээс хойш сонин хандивын системээ сэргээж чадаагүй. Компаниуд, банкууд дотоод журмаа шалтаглан редакцид үйлчлэхээс татгалзаж байгаа юм.

Хууль зүйн яам 2026 оны есдүгээр сард сониныг жагсаалтад оруулахдаа Соколов зэрэг сонинтой холбоотой 100 гаруй хүний нэрсийг нийтэлжээ. Түүний өмнөх ерөнхий редактор, 2021 онд Нобелийн энх тайвны шагнал хүртсэн Дмитрий Муратов 2023 онд гадаадын агентаар бүртгэгдсэнийхээ дараа албан тушаалаа орхижээ.

Аравдугаар сарын 15-нд Соколовыг сонины сэтгүүлч Олег Ролдугины хэргээр гэрчээр байцаажээ. Ролдугиныг хувийн мэдээлэл агуулсан компьютерийн мэдээлэлд хууль бусаар нэвтэрсэн хэргээр дөрөвдүгээр сард баривчилж, редакцид олон цагийн нэгжлэг хийсэн бол зургадугаар сарын эхээр түүнийг гэрийн хорионд шилжүүлжээ.

Сонин 2022 оны гуравдугаар сарын сүүлээр Орос Украины эсрэг дайн эхлүүлсний дараа Роскомнадзорын сануулгаар түр зогссон бөгөөд тэр оны намар шүүх хэвлэмэл хувилбар, цахим хуудасны тусгай зөвшөөрлийг нь хүчингүй болгосон юм.

Сөрөг хүчний хэвлэл гэсэн нэр хүндтэй тус сонины хэд хэдэн сэтгүүлч амиа алдсан байна. Тэдний нэг Политковская Чечений тэргүүн Рамзан Кадыровыг хатуу шүүмжилж, тус бүгд найрамдах улс дахь дайны гэмт хэргийн талаар бичиж байсан бөгөөд байрныхаа орцонд буудуулж нас барсан юм.