Орос Африкийн орнуудад бүх чиглэлээр туслалцаа үзүүлж байна гэж Захарова мэдэгдэв

Орос Африкийн орнуудад бүрэн эрхт тэгш байдал, харилцан хүндэтгэл, харилцан ашигтай байх зарчимд тулгуурлан туслалцаа үзүүлж байгааг Оросын Гадаад хэргийн яамны хэвлэлийн төлөөлөгч Мария Захарова мэдэгджээ. Тэрбээр Орос-Африкийн гуравдугаар дээд хэмжээний уулзалтын хүрээнд болсон Орос-Африкийн хэвлэл мэдээллийн форум дээр ингэж хэлснийг Интерфакс агентлаг мэдээлэв.

Захаровагийн хэлснээр, Орос дипломат харилцааныхаа зэрэгцээ худалдаа, эдийн засгийн хамтын ажиллагааг идэвхтэй хөгжүүлж байна. «2025 оны дүнгээр Оросын Африкийн орнуудтай хийсэн худалдааны эргэлт 27 тэрбум ам.доллараас давсан. Египет, Алжир уламжлал ёсоор манай хамгийн том худалдааны түнш байдаг» гэж тэрбээр хэлэв. Мөн Марокко, Өмнөд Африк, Тунис, Нигери зэрэг улстай эдийн засгийн харилцаа идэвхтэй хөгжиж байна гэжээ.

Захаровагийн хэлснээр, хүнсний аюулгүй байдал Орос болон Африк тивийн хувьд хамгийн чухал чиглэлүүдийн нэг хэвээр байна. Орос зөвхөн 2025 онд Африкийн орнуудад 18 сая гаруй тонн үр тариа нийлүүлсэн бөгөөд 2026 оны эхний есөн сард дахиад 13 сая тонн нийлүүлжээ. Эрдэс бордооны нийлүүлэлт ч өсч, өнгөрсөн жил 1.5 сая тонн байсан бол энэ онд 2.2 сая тонноос давжээ.

Тэрбээр хүнсний аюулгүй байдал зөвхөн Африк тивийн хувьд бус, бүх дэлхийд улам чухал болж байгааг онцолсон. Түүний үзэж буйгаар, дэлхийн тоглогчдын адал явдалд хошуурсан, хариуцлагагүй үйлдлийн улмаас урьд нь цатгалан амьдардаг байсан олон бүс нутагт хүнсний аюулгүй байдлын асуудал гэнэт хурцаар тавигджээ.

Захарова Африк тив хөдөө аж ахуйн асар их боломж, нөөцтэй тул өөрийгөө төдийгүй бусдыг ч бүтээгдэхүүнээр хангаж чадна гэж үзэж байна. Түүний хэлснээр, Орос агрономи, үйлдвэрлэл, бордоо үйлдвэрлэлийн технологи, туршлагаа шилжүүлэхэд идэвхтэй тусалж, бордоо нийлүүлэхээс гадна түүнийг хамтран үйлдвэрлэхэд бэлэн байна.

Хоёр тал эрчим хүч, дэд бүтэц, аж үйлдвэр, хөдөө аж ахуй, боловсон хүчин бэлтгэх салбарт хамтарсан төсөл хэрэгжүүлж байгаа бөгөөд одоогоор Орос, Африкийн орнуудын хооронд засгийн газар хоорондын хоёр талын 22 комисс ажиллаж байна. Захарова олон улсын аюулгүй байдал, терроризм, үндэстэн дамнасан гэмт хэрэг, хар тамхины наймаа, хүн худалдаалахтай тэмцэх хамтын ажиллагаа хамгийн чухал гэдгийг онцолжээ.