Орос бункерийн жингээр 140 сая орчим тонн үр тариа хураажээ

ОХУ-д өнөөдрийн байдлаар бункерийн жингээр 140 сая орчим тонн үр тариа, тэр дундаа 95 сая гаруй тонн улаан буудай хураасныг Хөдөө аж ахуйн сайд Оксана Лут Төрийн Думын хорооны хуралдааны үеэр мэдэгджээ. Энэ тухай Интерфакс агентлаг мэдээлэв.

Сайдын хэлснээр, үр тариа, буурцагт ургамлын хураалт бараг 97 хувьтай дуусч, жилийн эцэст цэвэр жингээр 140 сая орчим тонн үр тариа авах төлөвтэй байгаа нь дотоодын хэрэгцээг бүрэн хангаж, экспортын өндөр чадавхыг хадгалах боломж олгоно.

Тосны гол ургамлын хураалт 34.8 сая тонн болж, өмнөх оны мөн үеэс бараг 13 хувиар их байна. Яамны тооцоогоор, ургац цэвэр жингээр 35 сая тонноос давах юм.

Чихрийн нишингийн ургац 52 сая тонн хүрэх төлөвтэй бол жимс, жимсгэнэ 2.3 сая тонн болж дахин дээд амжилт тогтоох бөгөөд үүний 2.1 сая орчим тонн нь алим байх юм.

Мал аж ахуйд эхний есөн сард гахайн мах, сүү, өндөгний үйлдвэрлэл өсчээ. Загасны салбарт сельдь загасны барилт 800 мянга орчим тонн болж дээд амжилт тогтоох төлөвтэй бөгөөд загасны аж ахуйн үйлдвэрлэл 15 гаруй хувиар өссөн байна.

Хөдөө аж ахуйн бүтээгдэхүүний экспорт өмнөх оныхоос хамаагүй өндөр байгаа бөгөөд одоогоор 34 тэрбум ам.долларын 65 сая орчим тонн бүтээгдэхүүн гадаадад нийлүүлжээ. Хөдөө аж ахуйн технологийн экспорт оны эхнээс 13 хувиар өссөн байна.