Орос Египеттэй нисгэгчгүй нисэх системийн үйлдвэрлэл байршуулах асуудлыг хэлэлцжээ

Оросын нисгэгчгүй нисэх системийн үйлдвэрлэгчид Африкийн орнуудад, тэр дундаа геологи хайгуулын технологийн үйлдвэрлэлээ байршуулж болно гэж ОХУ-ын Аж үйлдвэр, худалдааны сайд Антон Алиханов «Орос-Африк» форумын аж үйлдвэрийн яриа хэлэлцээний хуралдаанд мэдэгджээ. Энэ тухай Интерфакс агентлаг мэдээлэв.

«Бид энэ тоног төхөөрөмжийг нийлүүлэхээс гадна бүрэн үйлчилгээ, Африкийн орнуудын мэргэжилтнүүдийг сургах үйлчилгээ санал болгож байна. Өчигдөр Египетийн хамт олонтой санал солилцсон бөгөөд бид эдгээр нисгэгчгүй нисэх системийн үйлдвэрлэлийг Африкийн орнуудад байршуулахад бэлэн байна» гэж сайд хэлжээ.

Алиханов жишээ болгон форумын үзэсгэлэнд танилцуулсан Оросын «Геоскан» компанийн технологийг дурдаж, тус компанийн нисгэгчгүй системүүд Ангол, Буркина-Фасо, Зимбабве, Танзани, Өмнөд Африк зэрэг орны зах зээлд нэр хүндээ тогтоосон гэжээ.

Мөн сайд Оросын нисгэгчгүй шийдлийг Африкийн орнуудын хөдөө аж ахуйг хөгжүүлэхэд ашиглах боломжтойг онцолжээ. Бүс нутгийн дотоодын нийт бүтээгдэхүүний 35 орчим хувийг хөдөө аж ахуйн салбар бүрдүүлдэг.