Оросын Курск муж Украины цэргүүд гарснаас хойш хэвийн амьдралдаа эргэж чадаагүй байна

Украины цэргүүд 2024 оны наймдугаар сард нэвтэрч, 2025 оны дөрөвдүгээр сар хүртэл хэсэгчлэн эзэлсэн Оросын Курск муж хэвийн амьдралдаа эргэж чадаагүй байгааг Медуза сурвалжлагчаа илгээн мэдээлжээ.

Курск хотын төвд дуут дохио дуугарахад Хойд захын худалдаачид, худалдан авагчид хайхрахгүй наймаагаа үргэлжлүүлж байв. «Дрон, агаарын хамгаалалт бол бидний хувьд сонирхолтой шоу» гэж нэг иргэн ярьжээ.

Хохирогчдын эцсийн тоо одоог хүртэл гараагүй байна. Мөрдөн байцаах хорооны тэргүүн Александр Бастрыкин 2026 оны нэгдүгээр сард 445 иргэн амиа алдсан гэж хэлсэн бол наймдугаар сар гэхэд энэ тоо 640 болжээ.

Хил орчмын дүүргүүдээс 130 мянгаас илүү хүн дүрвэсэн бөгөөд тосгонууд нь амьдрахад тохиромжгүй хэвээр тул цөөхөн хүн л буцаж байна.

«Бэхлэлт байгаагүй. Хамгаалалтын мөнгийг хувааж идсэн. Биднийг зарсан гэж бод. Гэхдээ бид дассан» гэж 50 орчим насны эр хэлжээ.

Ерөнхий прокурорын газрын тооцоогоор бэхлэлтийн ажилд гурван тэрбум рублиэс илүү буюу 33 сая орчим евро хулгайд алдагджээ. Хэргээр орон нутгийн депутат, бизнесмэнүүд ял авч, хуучин Засаг дарга Алексей Смирнов 14 жилийн хорих ял сонссон байна. Мужид терроризмын эсрэг ажиллагааны горим албан ёсоор хүчинтэй хэвээр байгаа юм.