Оросын Восточный сансрын буудлаас хувийн компаниудын хиймэл дагуулыг төрийн дэмжлэгтэйгээр анх удаа хөөргөлөө

Оросын Восточный сансрын буудлаас Москвагийн цагаар 04:16-д “Союз-2.1б” зөөгч пуужин хувийн компаниудын “Коэн”, “Киноспутник” хиймэл дагуулыг тээн хөөрчээ. Энэ нь “Космос” үндэсний төслийн хүрээнд төрөөс татаас олгосон хувийн хиймэл дагуулын анхны хөөргөлт болсон гэж Роскосмос мэдэгдлээ.

“Коэн” хиймэл дагуулыг “МТ-лаб” компани, “Киноспутник”-ийг “Спутникс” групп бүтээсэн бөгөөд зөөгч пуужинг “Прогресс” пуужин-сансрын төв үйлдвэрлэжээ.

Хиймэл дагуулууд дэлхийн гадаргын маш өндөр нарийвчлалтай зураг авна. Авсан мэдээллийг газрыг зориулалтын дагуу ашиглаж буйг хянах, хууль бус барилгыг илрүүлэх, аюултай байгалийн үзэгдлийг ажиглах, байгаль орчны асуудлыг шийдвэрлэхэд ашиглахаар төлөвлөжээ.

“Спутникс” группийн мэдээллээр тус группийн дэлхийг зайнаас тандан судлах “Киноспутник-0,8” хиймэл дагуул тойрог замд гарч, Сколково дахь Нислэгийн удирдлагын төвийн мэдэлд шилжжээ. Уг хиймэл дагуулын салгах систем болон түүнтэй хамт Восточный буудлаас хөөргөсөн бичил хиймэл дагуул бүхий гурван чингэлгийг бүтээснээ “Аэроспейс кэпитал” хувийн компани хэвлэлийн мэдээндээ дурджээ.

“Космос” үндэсний төсөлд хувийн компаниудтай хамтран хиймэл дагуулын сүлжээ байгуулахаар тусгасан бөгөөд төслийн нийт санхүүжилтийг 500-750 тэрбум рубль гэж тооцож байжээ.

Восточный буудлаас хувийн хоёр хиймэл дагуул хөөргөхийг төр анх удаа дэмжиж, энэ ажлаа өргөжүүлнэ гэж Ерөнхий сайд Михаил Мишустин 2026 оны арваннэгдүгээр сард мэдэгдсэн. Тэргүүн шадар сайд Денис Мантуровын хэлснээр, 2030 он гэхэд төрийн байгууллагуудын дэлхийг зайнаас тандан судлах мэдээллийн хэрэгцээ 35 тэрбум рубль хүртэл байж магадгүй аж.