Пакистан Афганистанаас гаралтай террорист халдлагад санаа зовж байгааг Рубио онцолжээ
Рубиогийн мэдэгдэл Пакистан, Афганистаны хил дээр мөргөлдөөн хурцадсан үед гарчээ.
АНУ-ын Төрийн нарийн бичгийн дарга Марко Рубио Атлантад болсон G20-ийн Гадаад хэргийн сайд нарын уулзалтын үеэр Исламабад Афганистанаас гаралтай террорист халдлагад санаа зовж байгааг онцолж, АНУ Пакистаныг терроризмын бай болгохыг хүсэхгүй байна гэж мэдэгдсэн тухай «Хиндустан Таймс» сонин мэдээлжээ.
«Пакистан Афганистаны нутаг дэвсгэрээс ивээн тэтгэж буй террорист халдлагад санаа зовж байна. Талибанчууд эдгээр халдлагыг хязгаарлахын тулд хангалттай зүйл хийгээгүй гэж тэд үзэж байна» гэж Рубио хэлжээ.
Энэ мэдэгдэл Пакистан хил дамнасан буудлагын хариуд Афганистаны Талибаны хэд хэдэн хилийн пост, цэргийн байгууламжид цохилт өгсөн үед гарсан гэж Энэтхэгийн «Пи Ти Ай» агентлаг төрийн хэвлэл мэдээллийг иш татан мэдээлэв.
«Радио Пакистан»-ы мэдээлснээр аравдугаар сарын 27-нд Өмнөд Вазиристаны Ангур Адда орчимд Афганистаны Талибаны хүчнийхэн өдөөн хатгалгагүйгээр гал нээж, Пакистаны цэргүүд хариу цохилт өгчээ. Цохилтын улмаас Талибаны зарим цэрэг амь үрэгдсэн гэх мэдээллийг бие даан баталгаажуулах боломжгүй байна.
Харин Афганистаны Батлан хамгаалах яам аравдугаар сарын 28-нд Пакистаныг халдлагыг эхлүүлсэн гэж буруутгаж, Пакистаны талаас Пактика мужийн Ангур Адда зах руу нисгэгчгүй онгоцоор дөрвөн удаа цохилт өгсөн гэж мэдэгдсэн байна.
Исламабад Афганистаны Талибаны засгийн газрыг «Техрик-и-Талибан Пакистан» бүлэглэлийн зэвсэгтнүүдийг хоргодуулж, Пакистан дотор халдлага төлөвлөх, үйлдэхэд Афганистаны нутаг дэвсгэрийг ашиглуулж байна гэж буруутгадаг бол Талибанчууд үүнийг үгүйсгэдэг юм.
