Персийн булангийн орнууд их наяд долларын батлан хамгаалах бодлогоо эргэн харах шаардлагатай гэж тайланд дүгнэжээ

Персийн булангийн орнууд Ираны довтолгоонд эдийн засаг нь хохирч, АНУ-ын баазуудын ач холбогдол эргэлзээтэй болсон тул их наяд долларын батлан хамгаалах тогтолцоогоо өөрчлөх шаардлагатай гэж Олон улсын стратеги судлалын хүрээлэнгийн судалгаанд дүгнэжээ. Энэ тухай Гардиан сонин мэдээлэв.

Тайланд дурдсанаар, дөрөвдүгээр сарын 8-ны гал зогсоохоос өмнөх долоо хоногуудад голдуу Персийн булангийн 12 улс Ираны 4,670 нисгэгчгүй довтолгооны онгоц, 1,400 гаруй баллистик пуужинтай тулгарсны бараг тал нь Арабын Нэгдсэн Эмират руу чиглэжээ.

Ихэнхийг нь сөнөөсөн ч эрчим хүчний дэд бүтцэд учирсан хохирлыг 58 тэрбум ам.доллар хүртэл гэж тооцсон нэгэн үнэлгээг тайланд иш татсан байна.

“Тэдний АНУ-аас их наяд доллараар худалдан авсан зэвсэг шийдвэрлэх мөчид АНУ-ын хамгаалалт болж хувираагүй төдийгүй цэргийнх нь бэлтгэл шинэ төрлийн элэгдүүлэх агаарын дайнд хангалтгүй байна” гэж тайланд бичжээ.

Судлаачид агаар, пуужингийн довтолгооноос хамгаалах АНУ-ын системд хэт тулгуурлах, бүс нутгийн батлан хамгаалахын интеграцчлал дутмаг, мина цэвэрлэх чадавх хомс, хариу цохилтын хувилбар хязгаарлагдмал, харьцангуй хямд нисгэгчгүй онгоц, пуужинг үнэтэй системээр сөнөөх зардал хэт өндөр зэрэг сул талыг онцолжээ.

Тайланд АНУ-ын хүчин бүс нутгаас цөөрөх буюу гарах аливаа алхмыг Иран стратегийн ялалт болгон харуулж, Персийн булангийн орнуудыг АНУ-ын хамгаалалтад олон арван жил найдсаных нь төлөө ичээхэд ашиглана гэж анхааруулжээ. Бүс нутгийн олон нийтийн санаа бодол ч АНУ-ыг аюулгүй байдлын баталгаа бус стратегийн дарамт гэж харах болжээ.

Сенатын гадаад харилцааны хорооны гишүүн, Ардчилсан намын сенатор Крис Мерфи АНУ-ын цэргийнхэн Персийн булан дахь эвдэрсэн баазуудаа сэргээх эсэх талаар маргаж байгааг хэлсэн юм.

“Халуун дайн эхэлснээс хойш 24 цагийн дотор газрын зургаас арчигдах юм бол бүс нутагт бааз байлгаад ямар хэрэг байна” гэж Мерфи хэлж, АНУ бүс нутагт оролцоогоо багасгах шаардлагатай болно гэж үзжээ.