Пхукетийн хогийн цэг дүүрч, хог хүлээн авахыг түр зогсоожээ
Хогны машинууд удаан хүлээлгээс болж хогийн цэг рүү явах зам дагуу ачаагаа асгах болсон байна.
Тайландын Пхукет хотын дарга Суппачок Лаонгпхет ням гарагт хотын хог хаягдлын төвд хог хүлээн авахыг түр зогсоож, нөхцөл байдлыг тус мужийн хог хаягдлын долоо дахь хямрал гэж тодорхойлсныг Бангкок Пост сонин мэдээлжээ.
Мэдэгдэлд дурдсанаар, хогийн хэмжээ хогийн цэгийн багтаамжаас хэтэрсэн тул эрх баригчид одоо байгаа талбайд зай гаргахын тулд нэмэлт машин яаралтай хөлсөлжээ. Сүүлийн долоо хоногт хогны машинууд ачаагаа буулгахын тулд ердийнхөөс удаан хүлээх болсон.
Ням гарагийн өглөө олон машины жолооч хүлээлгүй, ачаагаа зам дагуу асгаж, бусад тээврийн хэрэгслийн замыг хааснаар нөхцөл байдал улам дордсон байна.
Хотын даргын хэлснээр, хог устгах цэгүүдэд 1.2 сая гаруй тонн хог хуримтлагдаж, анхны 900 мянга орчим тонны багтаамжаас хамаагүй хэтэрчээ. Хотжилт, хүн амын өсөлт, аялал жуулчлалын тэлэлт хогийн хэмжээг өсгөсөөр байна.
Бямба гарагийн байдлаар шатаах зуухыг тэжээх агуулахад 12 мянга гаруй тонн хог хуримтлагдаж, 9 мянган тонны төлөвлөсөн багтаамжаас давжээ. Пхукет өдөрт 700 орчим тонн хог устгах ганц зуухтай ч өдөрт 1200 орчим тонн хог гаргадаг бөгөөд аялал жуулчлалын оргил улиралд энэ тоо мэдэгдэхүйц өсдөг.
Хотын дарга шатаах хүчин чадлыг нэмэгдүүлэх нь дангаараа асуудлыг шийдэхгүй гэж үзэж, иргэд, бизнес эрхлэгчдийг хогоо эх үүсвэр дээр нь багасгаж, дахин боловсруулахыг уриалсан.
Ирэх оны зургадугаар сард ашиглалтад орох хоёр дахь шатаах зуух өдөрт нэмэлт 500 тонн хог боловсруулж, нийт хүчин чадлыг өдөрт 1200 орчим тоннд хүргэнэ.
