Росатом Ираны Бушер АЦС дахь оросын мэргэжилтнүүдийн тоог 300 хүртэл нэмэгдүүлнэ

Ираны Бушер атомын цахилгаан станцын талбайд ажиллаж буй оросын мэргэжилтнүүдийн тоо 180 хүрсэн бөгөөд ойрын хугацаанд үүнийг 300 болгохоор төлөвлөж байгааг Росатом корпорацийн дарга Алексей Лихачев арваннэгдүгээр сарын 13-нд мэдэгджээ.

“Өнөөдрийн байдлаар хүний тоо нэмэгдэж байна: 180 хүн аль хэдийн талбайд ажиллаж байгаа бөгөөд ойрын хугацаанд 300 болгохоор төлөвлөж байна. Учир нь ажил маань удааширч болзошгүй эрсдэл одоогоор харагдахгүй байна” гэж Лихачев Баасан гарагт сэтгүүлчдэд хэлжээ.

“Бүс нутгийн нөхцөл байдал мэдээж хурцадмал хэвээр байгаа ч ерөнхийдөө бид ирэх жилийн дотор ажлаа төлөвлөсөн хурдаар нь эргүүлэн явуулж, хүний тоог төлөвлөгөөт хэмжээнд хүргэхээр зорьж байна” гэж тэрбээр тэмдэглэв.

Росатом Ирантай том станцуудад зориулсан шинэ талбайн талаар албан ёсны тохиролцоотой, мөн бага чадлын эрчим хүчний блокуудын талаар хэлэлцээр байгуулсан байна. “Эдгээрийг одоогоор зохион байгуулалт, төслийн шатанд боловсруулж байна. Мэдээж энэ нь бас ерөнхийдөө тус улсын улс төр, цэргийн болон эдийн засгийн нөхцөл байдлаас ихээхэн шалтгаална” гэж Росатомын дарга хэлсэн байна.

“Ираны чиглэл бидний хувьд туйлын чухал гэдгийг дахин нэг хэлж, баталмаар байна” гэж Лихачев онцолжээ.

Бушер АЦС-ын талбайд 163 ажилтан эргэн ирж, төлөвлөгөөт урьдчилан сэргийлэх засварт мөн 31 мэргэжилтэн оролцож байгааг Лихачев өмнө нь Интерфакс агентлагт мэдэгдэж байсан юм.

Росатомын ерөнхий захирал аравдугаар сарын 27-нд тус корпорац Ираны АЦС дахь оросын мэргэжилтнүүдийн тоог 700 хүртэл нэмэгдүүлэх бодолтой байгааг мэдэгдэж байв.