Самсунгийн тэргүүн Ли Жэ Ён Япон дахь чип савлах технологийн лабораторид зочилжээ

Самсунг Электроникс компанийн гүйцэтгэх тэргүүн Ли Жэ Ён ням гарагт Японы Ёкохама хотод байрлах тус компанийн хагас дамжуулагчийн дэвшилтэт савлагааны технологийн лабораторид зочилж, тэнд судлаачдын тоог нэмэгдүүлэн, лабораторийг дараагийн үеийн савлагааны технологийн дэлхийн судалгааны төв болгохоо амласан гэж Кориа Таймс сонин мэдээлжээ.

Ли Жэ Ён судлаачидтай дэвшилтэт савлагааны материал, үйл явцын технологийн сүүлийн үеийн хөгжил, Японы материал, эд анги, тоног төхөөрөмжийн салбартай хамтын ажиллагааг бэхжүүлэх арга замын талаар ярилцжээ. Тэрбээр хиймэл оюуны процессорын хувьд дэвшилтэт савлагааны технологи чухал болж байгааг онцолсон байна.

Лабораторийг 2023 онд байгуулж, энэ оны есдүгээр сард албан ёсоор нээсэн бөгөөд Самсунг 2024 оноос эхлэн таван жилийн хугацаанд 40 тэрбум иен (254 сая ам.доллар) зарцуулж байгаа юм.

Дэвшилтэт савлагаа гэдэг нь график процессор, өндөр зурвасын санах ой зэрэг олон чипийг нэг багцад нэгтгэж, гүйцэтгэлийг нэмэгдүүлэх, зай хэмнэх, зардал бууруулах технологи юм.

Японд дэлхийн өрсөлдөх чадвартай хагас дамжуулагчийн материал, тоног төхөөрөмжийн олон компани төвлөрч, үйлдвэр, их сургууль, судалгааны байгууллагыг холбосон тогтолцоо хөгжсөн нь лабораторийн байршлыг сонгоход нөлөөлсөн байна.

Лаборатори цаашид судалгааныхаа хүрээг өргөжүүлж, ялтас холбох, шилэн суурь зэрэг дараагийн үеийн үйл явц, материалыг хамруулахаар төлөвлөжээ.