Сансрын хоёр нисгэгч Олон улсын сансрын станцад сүүлчийн шинэ нарны хавтанг суурилуулжээ

НАСА-гийн сансрын нисгэгч Анил Менон, Канадын сансрын нисгэгч Жошуа Кутрик нар Пүрэв гарагт сансарт гарч, Олон улсын сансрын станцын найм дахь буюу сүүлчийн эвхмэл нарны хавтанг суурилуулсныг Си Би Эс Ньюс телевиз мэдээлжээ.

Ингэснээр таван жил үргэлжилсэн эрчим хүчний системийн шинэчлэл дуусчээ.

НАСА 2021 онд анхны шинэ хавтанг станцын анхны найман далавчны нэгний сууринд суурилуулж эхэлсэн юм. Сүүлийн хоёр хавтанг энэ сарын эхээр Спэйс Икс компанийн ачааны хөлгөөр станцад хүргэжээ.

Станцын роботон гар станцын эрчим хүчний фермийн баруун зах хүртэл хүрэхгүй тул нисгэгчид сүүлчийн хавтанг бие биедээ дамжуулан байрлуулах цэгт нь хүргэжээ. Хавтанг бэхэлж, кабелиудыг холбосны дараа нислэгийн удирдагчид нэг хэсэг нь хүлээгдэж байсан бага хэмжээний цахилгаан гаргахгүй байгааг анзаарсан ч асуудлыг шийдвэрлэжээ.

«Энэ нь 40 хувиар илүү эрчим хүч өгч байна» гэж Менон станц руу буцаж орсныхоо дараа хэлжээ.

Шинэ хавтангууд хуучнаасаа жижиг ч илүү үр ашигтай. Хуучин хавтангийн зарим хэсгийг сүүдэрлэдэг ч нийтдээ эрчим хүчийг нэмэгдүүлдэг.

Анхны шинэ хавтанг суурилуулахаас өмнө станцын хуучин хавтангууд 160 орчим киловатт эрчим хүч үйлдвэрлэж байсан. Сүүлчийн хавтангаар нийт хүчин чадал 215 орчим киловатт хүрч, станцын амьдрал дэмжих систем, компьютер, судалгааны ажлыг 2030 он хүртэл хангах төлөвтэй.