Сенатор Крис Ван Холлен Сенат дахь олонхийн удирдагчийн суудлын төлөө Чак Шумертай өрсөлдөхөө зарлав

АНУ-ын Мэрилэнд мужаас сонгогдсон Ардчилсан намын сенатор Крис Ван Холлен пүрэв гарагийн орой Сенат дахь олонхийн удирдагчийн суудлын төлөө Нью-Йоркийн сенатор Чак Шумертай өрсөлдөхөө мэдэгдлээ. Тэрбээр өмнө нь ийм боломжийг үгүйсгэж байсан юм.

“Энэ сонгуулиар америкчууд ажилчин хүмүүсийн эсрэг эргүүлэгдсэн, улс төрийн авлигаар тэжээгдсэн эдийн засгийг засахыг биднээс шаардсан. Үүнийг биелүүлэхийн тулд шинэ удирдлага хэрэгтэй. Энэ бол ганц хүний асуудал биш, тэр шаардлагыг биелүүлэх асуудал юм. Тийм учраас би Сенат дахь олонхийн удирдагчид нэр дэвшиж байна” гэж Ван Холлен хэлэв.

75 настай Шумер бараг арван жил Сенат дахь Ардчилсан намынхныг удирдаж ирсэн бөгөөд удирдлагаа хадгалахыг хичээнэ. 120 дахь удаагийн Конгресст намыг илүү залуу, илүү дэвшилт үзэлтэй удирдагч тэргүүлэх ёстой гэж шаардах сенаторууд завсрын сонгуулийн дараа Ардчилсан намд олширсоор байна.

Өөрчлөлт шаардагчдын дунд бие даагч сенатор Берни Сандерс, Ардчилсан намын сенатор Элисса Слоткин нар байна. Завсрын сонгуульд ялалт байгуулсан зүүний үзэлтэй нэр дэвшигчид суудлаа эзлэхээр бэлтгэж буй энэ үед нам цаашид хэрхэн урагшлах талаар “ширүүн мэтгэлцээн” өрнүүлэх хэрэгтэй гэж тэд үзэж байна. Эдгээр шинэ гишүүдийн олонх нь мөн Шумерыг удирдагчаар дэмжихгүй гэдгээ мэдэгдсэн байна.

Шумераас арай залуу буюу 67 настай Ван Холлен даваа гарагт Слоткинтой уулзаж, энэ албан тушаалд нэр дэвших хүсэл сонирхлынхоо талаар ярилцжээ. Илүү төвийн үзэлтэй Слоткин “тодорхой төлөвлөгөө” танилцуулахгүй бол хэнд ч “тийм” гэж санал өгөхгүй гэдгээ хэлсэн.

Сенатын Ардчилсан намын удирдлагын сонгууль арванхоёрдугаар сарын эхээр болох төлөвтэй. Төлөөлөгчдийн танхимын даргыг гишүүдийн нэрийг дуудан амаар санал хураалгаж сонгодгоос ялгаатай нь энэ сонгууль нууц санал хураалтаар явагдана.