Сербид Алта банк хаагдсанаар тэнд амьдардаг олон мянган орос иргэн хохирчээ

Сербид амьдардаг орос цагаачдын дунд түгээмэл байсан Алта банкийг тус улсын төв банк 10 дугаар сарын сүүлээр хаасан нь олон мянган орос иргэнийг хохироосныг Москоу Таймс сайт мэдээлжээ.

Олон орос хүн Сербид эрхэлсэн бизнесийн орлого, эх орондоо байраа зарсан мөнгө зэрэг бүх хадгаламжаа энэ банкинд хадгалж байжээ. Банк хаагдсанаа үйлчлүүлэгчдэдээ мэдэгдээгүй тул мэдээ Телеграм болон амнаас аманд тархсан байна.

«Оросууд өөр хаана ч данс нээх боломжгүй байсан тул энэ банкийг ашигладаг байсан» гэж Хенри Жексоны нийгэмлэгийн судлаач Хелена Иванов хэлжээ.

Банк Александр Вучичийн Сербийн дэвшилтэт нам 10 дугаар сарын 25-ны парламентын сонгуульд оюутнуудын хөдөлгөөнд ялагдаж, 14 жилийн засаглал нь дуусгавар болсноос долоо хоног хүрэхгүй хугацааны дараа хаагдсан юм.

Тус намтай ойр банкны эзэн Давор Мацура Москва руу зугтахыг оролдсон гэх мэдээллээр энэ сарын эхээр баривчлагдсан. Сербийн мөрдөн шалгах сэтгүүлзүйн байгууллагын үзсэн баримтаар прокурорууд түүнийг 390 сая орчим еврог завшсан гэж буруутгаж байгаа ч тэрээр гэм буруугаа үгүйсгэж байна.

Вучич Мацуратай гуравхан, дөрвөн удаа уулзсан гэв. Мөнгөө алдсанаа мэдэгдсэн оросуудын ихэнх нь оюутны хөдөлгөөнийг дэмжиж, өөрийг нь болон Путиныг эсэргүүцдэг хүмүүс гэж тэрээр мэдэгджээ.

Даатгалд хамрагдсан хадгаламжийг төрийн өмчит банкаар дамжуулан олгох бол түүнээс их мөнгөтэй харилцагчид дампуурлын шүүхэд нэхэмжлэл гаргах ёстой бөгөөд мөнгөө буцааж авах баталгаагүй аж.

Белград дахь орос эзэнтэй кафе, дэлгүүрүүд зөвхөн бэлэн мөнгө авна гэсэн зар тавьж, нутгийн сербүүд орос эзэнтэй 70 аж ахуйн нэгжийн жагсаалт гаргаж, тэднээс бэлэн мөнгөөр худалдан авалт хийхийг уриалж байна.