Краснодарын соёлын дээд сургууль найрсаг бус орнуудын бүжгийг дипломын ажилд хориглосон гэж төгсөгч мэдэгдэв

Краснодарын улсын соёлын институтэд бүжиг дэглээчдийн дипломын ажилд бүжгийг нь тавихыг хориглосон орнуудын жагсаалт байдаг гэж тус сургуулийн төгсөгч Каролина Гонгадзе олон нийтийн сүлжээнд мэдэгдсэнийг Медуза сайт мэдээлжээ.

Гонгадзегийн дипломын сэдэв нь Гүржийн орчин үеийн бүжгийн урлаг дахь уламжлалт ардын урлаг байсан бөгөөд Гүрж Оросын хувьд найрсаг бус орон тул гүрж бүжгийг дипломын практик хэсэгт тавихыг хориглож магадгүй гэж түүнд хэлжээ.

Эцэст нь Гүрж хориглосон жагсаалтад ороогүй ч түүний ангийн нэг охинд молдав бүжиг тавихыг хориглосон байна.

Мөн нэгэн багш 11 дүгээр сард болох наадамд армян бүжиг тавихыг түүнээс хүссэн ч хоёр улсын харилцаа муу гэх шалтгаанаар уг бүжгийг наадмаас хасчээ.

Гонгадзегийн хэлснээр 2022 онд Украины бүжгийг дипломдоо тавьсан оюутнуудыг шалгалт өгөхөөс татгалзуулах гэж байсан аж.

Энэ нь албан ёсны жагсаалт эсэх, хэзээнээс мөрдөж эхэлсэн нь бичлэгээс тодорхойгүй бөгөөд сургууль тайлбар өгөөгүй, бичлэг одоо олон нийтийн сүлжээнд харагдахгүй байна.