Сэргээгдэх эрчим хүч, Ираны дайны нөлөөгөөр чулуужсан түлшний ялгарал энэ онд буурах төлөвтэй
Гэвч одоогийн хурдаар дэлхий дөрвөн жилийн дотор 1.5 хэмийн дулаарлын хязгаарт хүрэх эрсдэлтэй гэж эрдэмтэд анхааруулж байна.
Дэлхийн нүүрстөрөгчийн төслийн шинэ судалгаагаар чулуужсан түлш шатаахаас үүсэх ялгарал 2025 онтой харьцуулахад 0.4 хувиар буурах төлөвтэй байгааг Австралийн Эй Би Си телевиз мэдээлжээ.
Ормузын хоолойгоор тээвэрлэлт удаан хугацаанд тасалдсанаас газрын тосны ялгарал 2 хувиар буурсан нь гол нөлөө үзүүлжээ. Эрчим хүчний нэмэлт хэрэгцээг нар, салхины эрчим хүч улам ихээр хангаж байна.
«Чулуужсан түлшний ялгарал буурч байгаа нь урам зориг өгч байгаа ч геополитикийн цочролоос шалтгаалсан бууралт нь уур амьсгалын тогтвортой шийдэл биш» гэж судалгааны ахлагч, Эксетерийн их сургуулийн Пьер Фридлингштейн хэлжээ.
Ой мод доройтох, Эль-Ниньотой холбоотой хүлэрт түймрийн улмаас нийт нүүрстөрөгчийн ялгарал өнгөрсөн оны 42.8 тэрбум тонноос 2026 онд 43.3 тэрбум тонн болж өсөх юм.
Дулаарал 1.5 хэмд хүрэхээс өмнө ялгаруулж болох нүүрстөрөгчийн хэмжээ 150 тэрбум тонн үлдсэн бөгөөд одоогийн хурдаар дөрвөн жилийн дотор хүрэх аж.
Хятадын ялгарал 0.9 хувиар, АНУ-ынх 1.3 хувиар, Европын холбооных 1.5 хувиар буурах бол Энэтхэгийн ялгарал 4.4 хувиар өсөх төлөвтэй байна.
Төслийн гүйцэтгэх захирал Пеп Канаделлийн хэлснээр сүүлийн арван жилд эдийн засаг нь өсөхийн зэрэгцээ чулуужсан түлшний ялгарал нь буурсан 40 орон анх удаа бүртгэгдсэн нь өмнөх арван жилийнхээс хоёр дахин их юм.
