Тайландын Төв банк арилжааны банкуудыг кибер аюулгүй байдлаа бэхжүүлэхийг үүрэг болгожээ
Тайландын санхүүгийн системийг гуравдагч талын үйлчилгээ үзүүлэгчдээр дамжуулан нэвтрэх оролдлого нэмэгдсэн ч банкууд одоогоор халдлагыг сөрж чадаж байна.
Тайландын Төв банк даваа гарагт арилжааны банкуудтай уулзаж, дэлхий даяар нэмэгдэж буй кибер халдлага, санхүүгийн гэмт хэргийн эсрэг хамгаалалтаа бэхжүүлэх арга замыг хэлэлцсэнийг Бангкок Пост сонин мэдээлжээ.
«Кибер аюул дэлхий даяар нэмэгдэж, Тайландад ч банкны систем рүү нэвтрэх оролдлого олширсон. Одоогоор банкуудын хамгаалалтын систем эдгээр халдлагыг сөрж, санхүүгийн үйлчилгээ хэвийн үргэлжилж байна» гэж Төв банкны ерөнхийлөгч Витай Ратанакорн хэлжээ.
Хакерууд банкуудтай хамтран ажилладаг гуравдагч талын үйлчилгээ үзүүлэгч, гэрээт компаниудаар дамжуулан нэвтрэхийг оролдож байгаа аж.
Төв банк санхүүгийн байгууллагуудыг кибер аюулгүй байдлын хяналтаа чангатгаж, сэжигтэй үйл ажиллагаа болон болзошгүй халдлагыг өдөр бүр мэдээлэхийг үүрэг болгожээ.
Витай олон нийт банкны үйлчилгээ тасалдах вий гэж сандарч, бэлэн мөнгө авах, хүнс нөөцлөх шаардлагагүй гэдгийг онцолсон байна.
Засгийн газар кибер аюулын эсрэг арга хэмжээгээ хамгийн дээд түвшинд хүргэж, зөвхөн санхүүгийн салбарт бус бүх салбарт хамгаалалтыг нэмэгдүүлж байна гэж Сангийн сайд Экнити Нититханпрапас мэдэгджээ.
Тайландын банкууд банкны салбарын компьютерын яаралтай хариу арга хэмжээний нэгдсэн төвөөр дамжуулан Төв банктай холбогдож, системээ хамтран хянадаг. Банкуудын холбоо болон банкууд 11 дүгээр сарын 7-ноос хойш санхүүгийн системийн аюулгүй байдлын талаар олон нийтэд мэдэгдэл гаргаж эхэлсэн юм.
