81 настай М. Жон Харрисон Букерийн шагналын хамгийн өндөр настай эзэн болжээ
Шинжлэх ухааны уран зөгнөлт зохиолын ертөнцөөс гарсан анхны Букерийн шагналт Харрисон төрөл бүрийн зохиол хоорондын хил хязгаарыг арилгах зорилготой иржээ.
Английн зохиолч М. Жон Харрисон 81 настайдаа дэлхийн апокалипсисийн дараах үеийн тухай дистопи романаараа Букерийн шагнал хүртэж, түүхэн дэх хамгийн өндөр настай ялагч болсныг Шинэ Зеландын Эр Эн Зэт радио мэдээлжээ.
Шагналын үнийн дүн 50 мянган фунт стерлинг юм. Роман нь нууцлаг довтолгооны улмаас нийгэм нурсны дараах хэдэн арван жилд Английн өмнөд хэсэгт амьдардаг нэгэн эр болон түүний нагац эгчийн тухай өгүүлдэг.
Харрисон уг романыг 2008 оны дэлхийн санхүүгийн хямралаас санаа авч бичиж эхэлсэн бөгөөд сэдэв, ёгт хошигнол нь өнөөгийн үйл явдлаас төрсөн гэж хэлжээ.
«Энэ бол ирээдүйн нүдээр харсан өнөөгийн улс төр» гэж шүүгчдийн зөвлөлийн дарга, сонгодог судлаач Мэри Бирд тодорхойлсон байна.
Бирдийн хэлснээр Пульп хамтлагийн ахлагч Жарвис Кокер зэрэг шүүгчид уг номыг санал нэгтэйгээр ялагчаар сонгожээ. Тэрбээр урьд нь Букерийн шагнал хүртэж байсан хоёр зохиолчийн шинэ номыг давж гарсан байна.
Букерийн шагналын сангийн гүйцэтгэх захирал Гэби Вуд Харрисоныг шинжлэх ухааны уран зөгнөлт зохиолын ертөнцөөс гарсан анхны Букерийн шагналт гэж тодорхойлжээ.
Букерийн шагналыг 1969 оноос олгож эхэлсэн бөгөөд Их Британи эсвэл Ирландад хэвлэгдсэн англи хэл дээрх бүтээлд олгодог. 2025 оны шагналыг Дэвид Салай хүртэж байжээ.
