Шуурганд нэрвэгдсэн Газын олон мянган иргэн 150 мянган майхныг хүлээн оронгүй үлджээ

Амралтын өдрүүдэд болсон аюултай шуурганы дараа Газын хэдэн арван мянган палестин хүн усанд норсон, эвдэрсэн майханд үлдсэн бол 150,000 шинэ майхан Израилийн зөвшөөрлийг хүлээн Газаас гадна байгааг тусламжийн байгууллагууд мэдэгджээ. Энэ тухай Гардиан сонин мэдээлэв.

Шуурганы улмаас дор хаяж 4 хүүхэд, нэг эмэгтэй амиа алджээ. Палестины Эрүүл мэндийн яамны мэдээлснээр, нэг хүүхэд үерийн усанд живж, дор хаяж 3 хүүхэд, тэдний ээж майхан дээр нь элсэн манхан нурснаар нас барсан байна.

НҮБ-ын мэдээлснээр, Газад 940,000 хүн үерийн эрсдэлтэй бүсэд түр майханд амьдарч байгаа ч цахилгаан тасарсны улмаас борооны ус шахах байгууламж ажиллахгүй байна. Бороо орсны дараа 26,000 өрх НҮБ-аас тусламж хүссэн бол дор хаяж 3,900 өрх огт оронгүй болжээ.

“Хүүхдүүд маань бүгд өвдсөн, би тэдэнд дахин хувцас авч өгөх мөнгөгүй” гэж дүрвэгч Раед Жамал хэлжээ. 7 сартай хүүхдийн ээж Нур аль-Батш майхан нь нурсны дараа хагас нурсан байрыг бусадтай хамт сард 500 ам.доллараар түрээслэхэд хүрсэн гэнэ.

Хүйтэн, чийглэг, хэт олон хүнтэй орчинд амьсгалын замын өвчин нэмэгдэж, өнгөрсөн өвөл шиг хүүхдүүд хөлдөж нас барах эрсдэлтэй гэж Палестинд эмнэлгийн тусламж үзүүлдэг Их Британийн байгууллага анхааруулжээ.

Шелтербокс байгууллагын майхнууд бараг хоёр жил Газаас гадна хүлээгдэж байгаа тул тэд брезент, модон тавиураар түр байр хийхэд хүрсэн ч эдгээр материалыг ч хязгаарлаж байна гэжээ. Тусламжийн ажилтнуудын хэлснээр, хоёр зориулалттай бараанд Израилийн тавьсан хязгаарлалт, боомтын түгжрэлээс болж байдал өнгөрсөн оныхоос дээрдээгүй байна.

Араб-Британийн харилцан ойлголцлын зөвлөл Их Британийн засгийн газрыг Израильд шахалт үзүүлж, Газад хангамж оруулах, Эмч нар хил хязгааргүй, Оксфам, Норвегийн дүрвэгсдийн зөвлөл зэрэг олон байгууллагын тусгай зөвшөөрлийг сэргээхийг уриалжээ.

Израилийн эрх баригчид өдөрт дунджаар 600 ачааны машин оруулж байна гэдэг ч 12 тавиурыг нэг машин гэж тооцдог тул ердийн 20 орчим тавиуртай харьцуулахад 40 орчим хувиар бага гэж Израилийн Гиша байгууллага шүүмжилжээ. Израиль өнгөрсөн долоо хоногт Газад 10,000 майхан оруулсан гэж мэдэгдсэн ч Газын хүн амын 94 хувь орон байрны тусламж хэрэгтэй байгаа юм.