Солонгосын атомын цахилгаан станцын компани Чехийн төслийн барилгын гэрээний хэлэлцээг зогсоожээ

Өмнөд Солонгосын төрийн өмчит Корея Хайдро энд Нюклеар Пауэр компани Чехэд хэрэгжүүлэх атомын цахилгаан станцын төслийн барилгын гэрээний гол нөхцөлөөр талууд тохиролцож чадаагүй тул дотоодын консорциумтай хийж буй хэлэлцээгээ зогсоосноо пүрэв гарагт мэдэгджээ. Энэ тухай Ёнхап агентлаг мэдээлэв.

«Компани Дукованы атомын цахилгаан станцын төслөөр Дэү Инженеринг энд Констракшн, Дусан Энербилити компаниудаас бүрдсэн консорциумтай хийж буй хэлэлцээг зогсоохоор шийдлээ. Гэрээний гол нөхцөлийн талаарх санал зөрөлдөөнөөс болж хэлэлцээ тасарсан» гэж компани хэвлэлийн мэдээндээ дурджээ.

Компани хэлэлцээг албан ёсоор дуусгаж, шинэ гүйцэтгэгч сонгох тендерт бэлтгэж эхлэх аж. Хэлэлцээ дууссан нь төсөл бүхэлдээ цуцлагдсан гэсэн үг биш бөгөөд дараагийн арга хэмжээгээ бэлтгэж байгаа гэж компани мэдэгджээ.

Ойролцоогоор 25 их наяд вон буюу 17.5 тэрбум ам.долларын өртөгтэй Дукованы төслөөр Чехэд Өмнөд Солонгосын загварын тус бүр 1000 мегаваттын хоёр реактор барих юм.

Тус компаниар ахлуулсан Өмнөд Солонгосын консорциум өнгөрсөн жил төслийн тендерт ялсан бөгөөд дараа нь барилгын гүйцэтгэгчээр тодорхойлогдсон Дэү, Дусаны консорциумтай барилгын гэрээний хэлэлцээ хийж байв.