Ерөнхийлөгч И Жэ Мёнийг дэмжигчдийн хувь 46 хувь болж өсчээ

Өмнөд Солонгосын Ерөнхийлөгч И Жэ Мёний үйл ажиллагааг дэмжигчдийн хувь энэ долоо хоногт 46 хувь болж, бараг хоёр сарын дараа анх удаа дэмжихгүй байгаа хүмүүсийн хувиас давжээ. Энэ тухай Ёнхап агентлаг хоёр долоо хоног тутам явуулдаг санал асуулгын дүнг иш татан мэдээлэв.

Даваа гарагаас лхагва гараг хүртэл улсын хэмжээнд 1000 насанд хүрэгчдийн дунд явуулсан санал асуулгаар Ерөнхийлөгчийн ажлыг эерэгээр үнэлэгчид хоёр долоо хоногийн өмнөхөөс 2 нэгж хувиар нэмэгджээ. Сөрөг үнэлгээ 5 нэгж хувиар буурч 44 хувьд хүрсэн байна.

И Жэ Мёнийг дэмжигчид хамгийн сүүлд наймдугаар сарын сүүлээр 50 хувьтай байж эсэргүүцэгчдээс давж байсан юм. Түүнээс хойш есдүгээр сарын дунд болон аравдугаар сарын эхний долоо хоногт хоёр удаа дараалан 43 хувь болж түүхэн доод түвшиндээ хүрээд, өмнөх санал асуулгаар 44 хувь болж өссөн байжээ.

Эрх баригч Ардчилсан намыг дэмжигчид 3 нэгж хувиар нэмэгдэж 36 хувь болсон бол сөрөг хүчний Ардын хүч намынх 3 нэгж хувиар буурч 25 хувьд хүрсэн байна.

Дээд шүүхийн Ерөнхий шүүгч Чо Хи Дэг огцруулах эсэх асуултад оролцогчдын 34 хувь дэмжиж, 45 хувь эсэргүүцжээ. Сүүлийн долоо хоногуудад зарим хууль тогтоогч Ерөнхийлөгчийн тамгын газрын хүсэлтийг үл харгалзан Чо Хи Дэ Дээд шүүхэд шинэ нэр дэвшигч санал болгохоос татгалзсан, сонгуульд хөндлөнгөөс оролцсон, албаны хөрөнгийг зохисгүй зарцуулсан гэх үндэслэлээр түүнийг огцруулахыг шаардаж байгаа юм.

Санал асуулгын алдааны хязгаар 95 хувийн итгэх түвшинд нэмэх хасах 3.1 нэгж хувь байна.